काठमाडौँ । नेपाली कांग्रेसका महामन्त्री तथा सांसद गगन थापाविरुद्ध अदालतको अवहेलना सम्बन्धी मुद्दा सर्वोच्च अदालतमा दर्ता भएको छ। अधिवक्ता अनन्त लुइँटेलले आइतबार (वैशाख १४ गते) थापाविरुद्ध रिट दायर गरेका हुन् ।
सर्वोच्च अदालत प्रशासनले मुद्दा दर्ता गर्दै आगामी मंगलबार (वैशाख १६ गते) का लागि प्रारम्भिक सुनुवाइको मिति तोकेको जनाएको छ ।

लोकतन्त्र दिवसको अवसरमा काठमाडौंमा आयोजित कार्यक्रममा थापाले संवैधानिक निकायमा पदाधिकारी नियुक्तिका क्रममा अदालतले ‘डिल’ गरेको आरोप लगाउँदै गम्भीर प्रश्न उठाएका थिए ।

कार्यक्रममा उनले अदालतमाथि टिप्पणी गर्दै भनेका थिए, “अहिले सम्मानित अदालतले अख्तियार दुरुपयोग अनुसन्धान आयोगलगायत विषयहरूमा दुई/तीन वर्षदेखि मुद्दा झुलाइरहेको छ । कहिले हेर्दाहेर्दै भन्छ, कहिले भ्याइनभ्याइ भन्छ, कहिले भोलि हेर्ने भन्छ। यस्तो व्यवहारले अदालतको विश्वसनीयता कमजोर बनाउँछ ।”

थापाका यिनै अभिव्यक्तिलाई अदालतको अवहेलना भएको ठहर गर्दै रिट दायर गरिएको हो ।