वीरगंज । राष्ट्रिय परिचयपत्र बनाउने सेवाग्राहीहरूको चाप अत्यधिक बढेपछि सेवा सहज र सहुलियतपूर्ण बनाउन पर्सा जिल्ला प्रशासन कार्यालयले नयाँ व्यवस्था लागू गर्ने भएको छ। २०७९/१२/१२ मा प्रकाशित सूचनाअनुसार अब २०७९/१२/१५ देखि तोकिएको स्टेसनबाट मात्र सेवा प्रवाह हुने भएको छ।

यसअनुसार विन्ध्यवासिनी, बहुदरमाई, पर्सागढी र सखुवा प्रसौनी गाउँपालिकाका सेवाग्राहीहरूले जिल्ला प्रशासन कार्यालय, पर्साबाट सेवा लिनुपर्नेछ। जितपुरसिमरा, ठोरी, जगरनाथपुर र पटेर्वा सुगौली गाउँपालिकाका लागि ईलाका प्रशासन कार्यालय, सुपौलिमा सेवा प्रदान गरिनेछ। वीरगंज महानगरपालिकाका सबै वडाका सेवाग्राहीहरूले वीरगंज महानगरपालिकाको आदर्शनगरस्थित नगर कार्यालयमा सम्पर्क गर्नुपर्नेछ। पोखरिया, विष्णु, ठोरी, ठाकुरराम र कालीमाई गाउँपालिकाका सेवाग्राहीहरूले पोखरिया नगरपालिकाको कार्यालयमा सेवा लिनुपर्नेछ।

सूचनामा पर्सा जिल्ला प्रशासन कार्यालयमा अब तोकिएको क्षेत्रबाहेकका सेवाग्राहीको विवरण दर्ता नगर्ने उल्लेख गरिएको छ। सहायक प्रमुख जिल्ला अधिकारी प्रभु कुमार काफ्लेले हस्ताक्षरित सूचनामा सबै सम्बन्धित सेवाग्राहीहरूलाई निर्धारित स्थानमा सम्पर्क गर्न अनुरोध गरिएको छ।