बारा | सिकिन्द्र साह | बाराको सिम्रौनगढ नगरपालिका स्थित इसरा पोखरीको छेउमा आयोजित विशेष भेलामा आम जनता पार्टीका नेता तथा कार्यकर्ताहरूको उल्लेख्य उपस्थिति देखिएको छ। कार्यक्रममा पार्टीको मधेस प्रदेश अध्यक्ष उमेश कुसवाहाले लामो समयदेखि सिम्रौनगढमा भन्सारको व्यवस्था नभएको विषयमा सरकारको ध्यानाकर्षण गराउँदै गम्भीर प्रश्न उठाए।
कुसवाहाले भन्नुभयो, “विभिन्न पार्टीहरूको सरकार फेरिए पनि सिम्रौनगढको भन्सार समस्या समाधान गरिएन। दुई चक्का वा चार चक्का सवारीसाधनको भन्सारका लागि स्थानीय जनतालाई ३४ किलोमिटर टाढा बिरगंज वा २४ किलोमिटर टाढा गौर जानुपर्ने बाध्यता रहेको छ।” उहाँले राज्यको संरचना जनताको सुविधा भन्दा पनि शोषणमुखी बनेको आरोप लगाउनुभयो। “यहाँका सांसदहरूले न त प्रदेशमा आवाज उठाए, न त केन्द्रमै,” उहाँले थप्नुभयो।
कार्यक्रमका प्रमुख वक्ता पूर्व मन्त्री तथा आम जनता पार्टीका केन्द्रीय अध्यक्ष प्रभु साहले भन्सार तथा व्यापार प्रणालीप्रति आक्रोश व्यक्त गर्दै भन्नुभयो, “कांग्रेस, एमाले र माओवादी सबैको सरकार आयो तर सिम्रौनगढको विकासका लागि केही गरेनन्। भारतबाट सामान ल्याउँदा प्रशासनले दमन गर्ने, छिनझपट गर्ने अवस्था बनाइएको छ। दस हजारको सामानमा बीस हजार भन्सार तिर्नुपर्छ, तर अझै भन्सारको व्यवस्था छैन।”
साहले राज्यले जनताबाट कर असुल्ने तर सुविधा नदिने प्रवृत्तिको कडा आलोचना गर्दै, “मुख्यमन्त्री सिम्रौनगढकै सरोज कुमार यादव हुन्, उपराष्ट्रपति पनि यहींका हुन्, तर दुवै मौन छन्,” भन्दै अब जनताले सचेत र सशक्त बन्नुपर्ने समय आएको धारणा व्यक्त गर्नुभयो।
कार्यक्रममा सिम्रौनगढ उद्योग वाणिज्य संघका अध्यक्ष लाल बाबू कुसवाहा, रौतहट जिल्लाको मौलापुर नगरपालिकाकी नगरप्रमुख रिन कुमारी साहसहित थुप्रै स्थानीय बासिन्दाको उपस्थिति थियो। भेलाले सिम्रौनगढको भन्सार समस्या समाधानका लागि आवाज उठाउने प्रतिबद्धता व्यक्त गर्दै समापन भएको थियो।
