वीरगञ्ज । वीरगञ्ज महानगरपालिका अन्तर्गतको छपकैयामा भएको झडपपछि जिल्ला प्रशासन कार्यालय, पर्साले कर्फ्यु आदेश जारी गरेको छ। प्रमुख जिल्ला अधिकारी गणेश अर्यालद्वारा जारी आदेशअनुसार चैत ३० गते साँझ ६:३० बजेदेखि चैत ३१ गते बिहान ११ बजेसम्मको लागि चार किल्लाभित्र सर्वसाधारणको आवतजावत, भेला, जुलुस, प्रदर्शन, सभा तथा जमघटमा पूर्ण प्रतिबन्ध लगाइएको छ।

स्थानीय प्रशासन ऐन, २०२८ को दफा ६(क) अनुसार जारी आदेशमा वीरगञ्ज महानगरपालिकाको सीमाभित्र पर्ने चार वटा स्थानलाई कर्फ्यु क्षेत्र घोषणा गरिएको छ। ती स्थानहरू निम्न छन्:

१. पूर्व: भेडियाही चौक – वीरगञ्ज महानगरपालिका–१५
२. पश्चिम: सिर्सिया पुल – वीरगञ्ज महानगरपालिका–२५
३. उत्तर: गण्डक चौक – वीरगञ्ज महानगरपालिका–१४
४. दक्षिण: शंकराचार्य गेट – वीरगञ्ज महानगरपालिका–१६

कर्फ्यु आदेश उल्लंघन गर्नेप्रति प्रशासनले कडा कारबाही गर्ने चेतावनी दिएको छ। स्थिति नियन्त्रणमा राख्न सुरक्षाकर्मीहरूको बाक्लो उपस्थिति रहेको छ। प्रशासनले नागरिकहरूलाई संयमता अपनाउन र अफवाहमा नलाग्न अनुरोध गरेको छ।

झडपपछि तनावग्रस्त बनेको वीरगञ्जको छपकैया क्षेत्रमा शान्ति पुनःस्थापनाको लागि प्रशासन र सुरक्षा निकायले उच्च सतर्कता अपनाएको जनाइएको छ।