पर्सा । पर्सा जिल्लामा लागु औषध दुव्र्यसनी रोकथाम तथा नियन्त्रण सम्बन्धी ३ महिने सचेतनामुलक अभियान आजबाट औपचारिक रूपमा सुरु भएको छ। जिल्ला प्रशासन कार्यालय पर्साको आयोजनामा वीरगन्जको होटल पूजनमा आयोजित उद्घाटन समारोहमा वीरगन्ज महानगरपालिकाका प्रमुख राजेशमान सिंहले अभियानको शुभारम्भ गरेका छन्।
कार्यक्रममा पर्साका प्रमुख जिल्ला अधिकारी गणेश अर्यालको अध्यक्षता रहेको थियो। उद्घाटन समारोहमा सहभागी वक्ताहरूले लागु औषध दुव्र्यसनी रोकथाम र नियन्त्रणका लागि व्यक्तिगत तहमा सचेतना फैलाउनुपर्ने आवश्यकतामा जोड दिए। उनीहरूले बढ्दो बेरोजगारी र छिट्टै पैसा कमाउने महत्वाकांक्षाका कारण युवाहरू गलत गतिविधिमा संलग्न हुने गरेको औंल्याउँदै स्थानीय तहबाटै युवालाई रोजगारीका अवसर प्रदान गरी व्यस्त राख्नुपर्ने बताए।
जिल्ला प्रहरी कार्यालय पर्साका प्रवक्ता प्रहरी नायव उपरीक्षक किशोर लम्सालले लागु औषध दुव्र्यसनी, ओसारपसारको समग्र अवस्था, कानूनी व्यवस्था र यसले समाजमा पार्ने नकारात्मक प्रभावबारे कार्यपत्र प्रस्तुत गरे। उनले पर्सा जिल्लामा लागु औषधको समस्या नियन्त्रणका लागि प्रहरीको सक्रियता र समुदायको सहयोग अपरिहार्य रहेको बताए।
त्यस्तै, गैरसरकारी संस्था विजामले नेपालमा लागु पदार्थको प्रयोगको अवस्था, विशेषगरी मधेस प्रदेशका प्रयोगकर्ताहरूको स्थिति र यसले निम्त्याएका चुनौतीहरूबारे कार्यपत्र प्रस्तुत गरेको थियो।
