वीरगंज । जनता समाजवादी पार्टी नेपालका अध्यक्ष उपेन्द्र यादवले काँग्रेस र कम्युनिष्टको शासन रहेसम्म देशमा विकास हुन नसक्ने बताएका छन् ।
गरुडामा जसपा नेपालको प्रथम रौतहट जिल्ला अधिवेशनको उद्घाटन गर्दै यादवले गत ३५ वर्षदेखि देशमा कांग्रेस र कम्युनिष्टको शासन रहेको तर देशमा विकास हुन नसकेको दाबी गरे । कांग्रेस र एमालेका कारण देशमा चरम गरिबी र बेरोजगारी बढेको आरोप लगाउँदै अध्यक्ष यादवले विकासको साटो देश अनेक समस्याको दलदलमा फस्दै जानु चिन्ताको विषय भएको बताएका छन् ।
यादवले ठोकुवा गर्दै भने – ‘यी दुई दलको शासन रहेसम्म देशमा सुशासन सम्भव छैन ।’ धेरै सम्भावना र संसारकै विकसित देश बन्ने आधार हुँदाहुँदै कांग्रेस–कम्युनिष्टकै कारण देशको अवस्था चिन्तनीय बनेको यादवको कथन छ ।
देशलाई विकासको गतिमा अगाडि बढाउन र देशबाट गरिबी बेरोजगारी अन्त्य गर्न सबै मिलेर आउँदो निर्वाचनमा कांग्रेस–कम्युनिष्टलाई नराम्ररी परास्त गर्नुपर्ने धारणा पनि यादवले राखेका छन् ।
विगत ३५ वर्षदेखि यो मुलुकको शासन गरेका कांग्रेस–कम्युनिष्टले देशको अर्थतन्त्र धरासायी बनाएको तथा कृषि, उद्योगको विकास र शिक्षा तथा स्वास्थ्यमा सुधार गर्न नसकेको आरोप यादवले लगाएका छन् । कांग्रेस–कम्युनिष्टको शासनमा देशमा भ्रष्टाचार मौलाउनुको साथै देशको अर्थतन्त्र धरासायी भएको, दिनहुँ युवाहरु विदेश पलायन भइरहेको र कमिसनतन्त्र बढेको आरोप पनि लगाएका छन् ।
देशका ठूलाठूला उद्योग धन्दा, कलकारखाना, कम्पनी बन्द हुँदा अहिले रोजगारी नपाएर यूवाहरु विदेश पलायन हुन बाध्य हुँदा पनि दुई दलले देश बनाउनुको सटा लुटधन्दामा लागेको कारण देशमा विकास हुन नसकेको आरोप लगाएका छन् ।
सरकारको नेतृत्व गरिरहेका दुवै दलले जनताको असन्तुष्टि सम्बोधन गर्न नसक्दा कांग्रेस–कम्युनिष्टबाट आजित भएर जनताहरु अहिले राजावादीको आन्दोलनमा सरिक हुन थालेको यादवको भनाइ छ । कांग्रेस–कम्युनिष्टकै कारण देशमा राजावादीहरु सल्बलाउन थालेको बताउँदै यादवले यसको समपूर्ण जिम्मा वर्तमान सरकारले नै लिनुपर्ने बताएका छन् ।
