बुटवल । पूर्व गृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेलाई सहकारी ठगी प्रकरणमा पुर्पक्षका लागि आज जिल्ला कारागार भैरहवा चलान गरिएको छ।

शुक्रबार राति काठमाडौंबाट पक्राउ परेका लामिछानेलाई चैत २३ गते यति एअरलाइन्सको विमानमार्फत गौतमबुद्ध विमानस्थलमा अवतरण गराई जिल्ला प्रहरी कार्यालय रुपन्देहीको हिरासतमा राखिएको थियो। सरकारी बिदाका कारण दुई दिन हिरासतमा बिताएपछि आज उनलाई जिल्ला अदालत रुपन्देहीमा थुनुवा पुर्जी दिई कारागार चलान गरिएको जिल्ला प्रहरी कार्यालय रुपन्देहीका सूचना अधिकारी डीएसपी सुरज कार्कीले जानकारी दिए। अदालतको फैसला नआउन्जेल उनी सोही कारागारमा रहनेछन्।

उच्च अदालत तुलसीपुरको बुटवल इजलासले गत शुक्रबार लामिछानेलाई सहकारीको रकम ठगी गरेको कसुरमा पुर्पक्षका लागि थुनामा पठाउन आदेश दिएको थियो। न्यायाधीशद्वय रमेश ढकाल र स्वीकृति पराजुलीको इजलासले जिल्ला अदालत रुपन्देहीको १ करोड धरौटीमा छाड्ने आदेशलाई बदर गरेको हो। उच्च अदालतको आदेशसँगै लामिछाने पक्राउ परेका थिए।

बुटवलको सुप्रिम सहकारी प्रकरणमा रुपन्देही जिल्ला अदालतले १ करोड धरौटी मागेको आदेशमा चित्त नबुझाएर लामिछानेले उच्च अदालतमा निवेदन दिएका थिए। तर, उच्च अदालतले लामिछानेलाई थुनामा राख्नका लागि दिएको आदेशमा जिल्ला अदालतले धरौटीमा छोड्दा दिइएका आधारहरूलाई खण्डन गरेको छ। उच्च अदालतले धरौटी वा थुनाको विकल्पको चयन मुद्दा तथा आरोपित कसुरको प्रकृति, घटना हुँदाको परिस्थिति र पीडितको अवस्थालगायत विभिन्न सान्दर्भिक पक्षको सापेक्षतामा निर्भर रहने व्याख्या गरेको छ।

यस घटनाले राष्ट्रिय राजनीति र रास्वपामा कस्तो प्रभाव पार्छ, त्यो भने भविष्यमा देखिनेछ। तर, कानुन सबैका लागि समान हुन्छ भन्ने सन्देश भने यस घटनाले दिएको छ।