काठमाडौं । कानुन व्यवसायीहरूको प्रमुख संगठन नेपाल बार एसोसिएसनको नयाँ नेतृत्व चयनका लागि भएको निर्वाचनको मतगणना आजदेखि सुरु हुने भएको छ। शनिबार सम्पन्न निर्वाचनपछि मतपेटिका काठमाडौं ल्याउन केही ढिलाइ भएका कारण मतगणना सोमबारबाट प्रारम्भ गर्न लागिएको हो ।

निर्वाचन समितिका अनुसार, आज दिउँसो १२ बजेपछि मतगणना प्रक्रिया सुरु हुनेछ। नेपाल बार एसोसिएसनको भवनमा सात स्थानमा मतगणना गरिने तयारी गरिएको छ । समितिका सदस्य रमण श्रेष्ठका अनुसार, सबै ३५ मतदान केन्द्रका मतपेटिका सङ्कलन भइसकेका छन् र अब १२ बजेपछि औपचारिक मतगणना प्रक्रिया शुरु हुनेछ ।

अध्यक्ष पदका लागि सत्ता साझेदार दल कांग्रेस र एमालेको गठबन्धनबाट डा. विजय मिश्र र महासचिव पदमा केदार प्रसाद कोइराला उम्मेदवार रहेका छन् । त्यस्तै, सत्ता इतर प्यानलबाट माओवादी केन्द्र निकट रमण श्रेष्ठ र महासचिव पदमा यज्ञमणि न्यौपाने उम्मेदवार छन् ।

शनिबारको निर्वाचनमा देशभरका ९ हजार ९९७ मतदाताहरूमध्ये ७ हजार ९९५ मत खसेको थियो। यो निर्वाचनमा नेपाल बार एसोसिएसनको नयाँ नेतृत्व चयनका लागि कानुन व्यवसायीहरूको ठूलो उत्साह र सहभागिता देखिएको छ । मतगणना परिणाम सार्वजनिक भएपछि नयाँ नेतृत्वका बारेमा स्पष्टता आउनेछ ।