काठमाडौं । आफ्नो स्वास्थ्य समस्याका कारण एक महिलाले आफ्नो डीएनए परीक्षण गराइन्। यस क्रममा उनले आफ्नो जन्म कृत्रिम गर्भाधानबाट भएको थाहा पाइन् । त्यसपछि उनले आफ्नो जैविक पिताको बारेमा खोजी गरिन् । यस क्रममा यस्तो खुलासा भयो जसले उनको होसहवास उड्यो ।

वास्तवमा उनका श्रीमानका जैविक पिता पनि उनै व्यक्ति थिए । यस हिसाबले उनीहरू एउटै पिताका सन्तान अर्थात दाजुबहिनी थिए । उनका श्रीमानले पनि डीएनए परीक्षण गराएपछि यसको पुष्टी भयो । उनीहरू दुवैको जन्म कृत्रिम गर्भाधानबाट भएको थियो र एउटै व्यक्तिले दुवैको लागि शुक्रकीट दान गरेका थिए ।

न्यूयोर्क पोस्टको रिपोर्ट अनुसार कनेक्टिकटकी दुई बच्चाकी आमा भिक्टोरिया हिलले बेलायतको आइटीभीको ‘दिस मर्निङ’ कार्यक्रमलाई बताएअनुसार उनले डीएनए परीक्षणपछि आफ्नो जैविक बुबा खोज्न वेबसाइट २३ एण्ड मीको मद्दत लिइन्।

यो डीएनए परीक्षण र वंश सेवाहरू प्रदान गर्ने कम्पनी हो। यसमा भर्चुअल आनुवंशिक परीक्षण डाटाबेस हुन्छ। कुनै समय धेरै लोकप्रिय रहेको यो कम्पनी अहिले टाट पल्टिने अवस्थामा पुगेको छ। यसपछि, सबै रहस्यहरू तह-तहबाट उजागर हुन थाले।

प्राप्त जानकारी अनुसार हिलले धेरै स्वास्थ्य समस्याहरू सामना गरेपछि चिकित्सा जानकारी प्राप्त गर्न २३एन्डमीलाई र्‍यालको नमूना दिएकी थिइन् । यसको परीक्षणपछि उनले केही सौतेनी दाजुभाइ दिदीबहिनीहरूको बारेमा थाहा पाइन् ।

खासमा न्यु इङ्गल्याण्ड क्षेत्रका एन्डोक्राइनोलोजिस्ट बर्टन काल्डवेलले हिलकी आमालाई गर्भवती बनाउन आफ्नो शुक्रकीट प्रयोग गरेका थिए। आफ्ना जैविक पिता ती डाक्टरसँग हिलको भेट पनि भयो । डाक्टरले हिलसँग भनेका थिए – ‘बच्चा चाहेका महिलाहरूलाई बच्चा जन्माउन मद्दत गर्नु मेरो काम हो। यसका लागि मैले आफ्नै शुक्रकीट पनि प्रयोग गरें।’

जब हिलले आफ्नो श्रीमानलाई यसबारे बताइन्, उनका श्रीमान झस्किए । किनकि उनको श्रीमानको जन्म पनि उनै डाक्टरले गराएका थिए। उनका श्रीमान् हाई स्कूलदेखि नै हिलका प्रेमी थिए। त्यसपछि उनका श्रीमानले पनि त्यसैगरी आफ्नो डीएनए जाँच गराए र आफ्नो जैविक बुबाको बारेमा जानकारी लिए। त्यसपछि थाहा भयो कि उनका जैविक बुबा पनि उही डाक्टर थिए।