काठमाडौँ । प्रेम सम्बन्धमा रहँदाका अन्तरङ्ग फोटो तथा भिडिओ सम्बन्ध बिग्रिएपछि सामाजिक सञ्जालमा पोस्ट गरिदिने भन्दै धम्की दिने एक व्यक्ति पक्राउ परेका छन् । सिराहाको धनगढी ७ गलबजार घर भई हाल काठमाडौँको सिनामङ्गल डेरा गरी बस्ने २७ वर्षीय राम विहारी साफीलाई साइबर ब्युरोको टोलीले बुधबार सो अभियोगमा पक्रेको हो ।

उनीमाथि त्यस्ता भिडिओ तथा फोटो सामाजिक सञ्जालमा पोस्ट गरिदिने, पीडितका आफन्तलाई पठाइदिने भनी धम्क्याउने, दुःख हैरानी दिने कार्य गरेको आरोप लागेको छ । पीडितको तर्फबाट ब्युरोमा निवेदन प्राप्त भएपश्चात् सो सम्बन्धमा प्राविधिक विश्लेषण र अनुसन्धान गर्दा साफीको संलग्नता खुल्न आएको प्रहरीले जनाएको छ ।

उनी माथि विद्युतीय कारोबार ऐन, २०६३ अन्तर्गतको कसुरमा मुद्दा दर्ता भई पक्राउ पुर्जी प्राप्त गरी काठमाडौँबाट पक्राउ गरिएको हो । काठमाडौँ जिल्ला अदालतको आदेशमा चार दिन म्याद थप गरी उनीमाथि थप अनुसन्धान भइरहेको ब्युरोले जनाएको छ ।