रौतहट ।सिकिन्द्र साह | रौतहट जिल्लाको गरुडा नगरपालिका वडा नम्बर १ निवासी राजकुमार साहले लामो समयदेखि सामाजिक सञ्जालमार्फत कमेडियनको रूपमा आम नागरिकलाई सन्देश दिँदै आएका छन्। आजको समयमा मधेश प्रदेशलगायत नेपाल तथा फिजी, मौरिसस जस्ता मुलुकमा भोजपुरी समाजमा कमेडियनहरूको लोकप्रियता बढ्दो छ।

राजकुमार साहले लेब अध्ययन पूरा गरेपछि करिब २२ वर्ष विभिन्न निजी कम्पनीमा जागिर गरी अनुभव बटुले। उनले रौतहटको ज्योति डिस्टिलरीमा चार वर्ष, डुमरिया डिस्टिलरीमा आठ वर्ष, सुदूरपश्चिमको कैलाली जिल्लाको धनगढीमा १० वर्ष सेवा गरे। लामो जागिरे जीवनपछि उनले समाजमा हास्यव्यंग्य मार्फत सकारात्मक सन्देश दिन सामाजिक सञ्जालमा भोजपुरी कमेडियनको रूपमा यात्रा सुरु गरे।

सामाजिक सञ्जालमा लोकप्रिय भएपछि उनले स्टेज कार्यक्रमहरू पनि गर्न थाले। मधेश प्रदेश, नेपालका विभिन्न ठाउँहरू तथा भारतको मुजफ्फरपुर, सितामढी लगायतका क्षेत्रमा स्टेज प्रोग्राम गरेर उनले भोजपुरी समुदायलाई मनोरञ्जन प्रदान गरे।
सिर्फ मनोरञ्जनमा सीमित नरही, उनले आफ्नो कमाइको केही हिस्सा समाजसेवामा पनि लगाउँदै आएका छन्। उनले रौतहट जिल्लाका केही प्रहरी चौकीहरूमा भौतिक संरचना निर्माणका लागि सहयोग गरे। साथै, मन्दिर, मस्जिद निर्माण तथा गरिब, दलित, असहाय व्यक्तिहरूलाई भेटी, कपडा र आर्थिक सहयोग समेत गरेका छन्।

सिम्रौनगढ संस्कृति तथा कमेडियन कार्यक्रममा वडा अध्यक्ष नन्दकिशोर प्रसादसँगको भेटमा उनले भने, “सामाजिक सञ्जालबाट नकारात्मक र सकारात्मक दुबै प्रकारका सन्देश जान्छन्। मैले आफ्नो सामाजिक सञ्जालमार्फत धेरैलाई सकारात्मक सन्देश दिएको छु। नेताहरूको ध्यानाकर्षण गराउँदै बम नहरमा बिजुली बत्ती समेत निर्माण गराएको छु।”

उनका अनुसार, सामाजिक सञ्जालमा राम्रो काम गर्न सके राम्रो आम्दानी पनि गर्न सकिन्छ। उनले करिब ८० लाखभन्दा बढी मानिसलाई हसाउन सफल भएको दाबी गर्दै भने, “हास्य कमेडियनका रूपमा निरन्तर सेवा दिइरहेको छु।”
राजकुमार साहको समाजसेवा र भोजपुरी कमेडियनको यात्रा नेपाली भोजपुरी समाजमा प्रेरणादायी बनेको छ।