वीरगञ्ज | वीरगञ्जस्थित बाल सुधार गृहको व्यवस्थापन, सुरक्षा, शिक्षा, स्वास्थ्य तथा संरचनागत सुधारका लागि १३ बुँदे निर्णय पारित गरिएको छ। वीरगञ्जमा आयोजित बैठकमा सुधार गृहमा बस्ने बालबालिकाका लागि थप सुविधाहरू उपलब्ध गराउने, सुरक्षाको प्रवन्ध गर्ने तथा विभिन्न संघसंस्थासँग समन्वय गरी व्यवस्थापनलाई प्रभावकारी बनाउने निर्णयहरू गरिएको हो।

बैठकमा पारित १३ बुँदे निर्णय यसप्रकार छन्:
1. बाल सुधार गृह परिसरमा मरम्मत – बाल सुधार गृह वरिपरि पर्ने संरचना तथा सामाग्री आवश्यक मर्मत गरी सुधार गरिने।
2. थप वाइफाइ र कम्प्युटर – बाल सुधार गृहमा रहेका बालबालिकाका लागि थप वाइफाइ जडान गर्ने, कम्प्युटर मर्मतसम्भार गर्ने।
3. मनोसामाजिक परामर्श सेवा – बाल सुधार गृहका सबै बालबालिकालाई मनोसामाजिक परामर्श नियमित रूपमा उपलब्ध गराउने।
4. खानेपानी तथा पोषणयुक्त भोजन – आवश्यकतानुसार स्वच्छ खानेपानी र पोषणयुक्त भोजन उपलब्ध गराउन जिल्ला प्रशासनसँग समन्वय गर्ने।
5. स्वास्थ्य उपचार र समस्या समाधान – सुधार गृहमा रहेका बालबालिकाका उपचार तथा अन्य समस्या समाधानका लागि वीरगञ्ज महानगरपालिका मार्फत आवश्यक पहल गर्ने।
6. फरार भएका बालबालिकाको खोजी प्रक्रिया – सुधार गृहबाट फरार भएका बालबालिकाको खोजी र पुनःस्थापनाका लागि जिल्ला प्रशासनसँग समन्वय गर्ने।
7. सहयोगी संस्थासँग समन्वय – पुस्तकालय व्यवस्थापन तथा अन्य आवश्यक व्यवस्थापनका लागि PABSON, NPABSON, लगायतका संस्थाहरूसँग समन्वय गर्ने।
8. शैक्षिक व्यवस्था – सुधार गृहमा रहेका बालबालिकाका लागि नियमित रूपमा खुला विद्यालय सञ्चालन गर्न वीरगञ्ज महानगरपालिकासँग समन्वय गर्ने।
9. कानुनी प्रक्रिया व्यवस्थित गर्ने – सुधार गृहका बालबालिकाका कानुनी प्रक्रियाहरू व्यवस्थित गर्न वीरगञ्ज महानगरपालिकासँग समन्वय गर्ने।
10. गुनासो व्यवस्थापन प्रणाली – सुधार गृहमा रहेका बालबालिकाहरूको गुनासो व्यवस्थापनका लागि सहज प्रणाली विकास गर्ने।
11. सुरक्षा व्यवस्था सुदृढीकरण – रातिको समयमा सुरक्षालाई थप व्यवस्थित गर्न सुरक्षागार्ड तथा अन्य आवश्यक उपाय अवलम्बन गर्ने।
12. CCTV जडान गर्ने – सुधार गृहको सुरक्षा व्यवस्थालाई प्रभावकारी बनाउन आवश्यक परेमा सीसीटीभी जडान गर्ने।
13. अनधिकृत प्रवेश निषेध – सुधार गृहमा अनाधिकृत व्यक्तिहरूको प्रवेशलाई नियन्त्रण गर्न कडाइ गर्ने।

यस बैठकमा वीरगञ्ज महानगरपालिकाका प्रतिनिधिहरू, शिक्षा क्षेत्रका सरोकारवाला, सुरक्षा निकायका पदाधिकारी, विभिन्न संघसंस्थाका प्रतिनिधिहरू तथा सुधार गृह व्यवस्थापन समिति सदस्यहरूको सहभागिता रहेको थियो। बैठकको अन्त्यमा पारित निर्णयहरू कार्यान्वयन गर्न सबै पक्षहरू मिलेर अघि बढ्ने प्रतिबद्धता व्यक्त गरिएको छ।