वीरगंज | भारत गुजरातको बनासकान्ठामा मंगलबार बिहान पटाका कारखानामा विस्फोट हुँदा २१ मजदुरको मृत्यु भएको छ। अधिकारीहरूका अनुसार यस घटनामा ५ जना घाइते भएका छन्। विस्फोटको प्रभाव यति भयावह थियो कि मृतक मजदुरका शरीरका अंगहरू ५० मिटर टाढासम्म छरिएका थिए।

दुर्घटनामा ज्यान गुमाउने सबै मजदुर भारतको अर्को राज्य मध्य प्रदेशको हर्दा जिल्लाका हुन्। उनीहरू दुई दिनअघि मात्र रोजगारीका लागि गुजरात गएका थिए। घटनास्थलमा आगो नियन्त्रण गर्न दमकल टोलीलाई झन्डै ६ घण्टा लाग्यो।

घाइते मजदुरहरूलाई उपचारका लागि सिभिल अस्पताल भर्ना गरिएको छ। उनीहरूमध्ये तीन जनाको अवस्था गम्भीर छ।

प्रारम्भिक अनुसन्धानअनुसार दीपक ट्रेडर्स नामक कम्पनीसँग पटाका बेच्ने अनुमति मात्र थियो। तर उत्पादनसमेत भइरहेको खुलासा भएको छ। प्रहरीले कारखाना सञ्चालकमाथि आवश्यक अनुसन्धान अघि बढाएको जानकारी दिएको छ।