वीरगञ्ज । पर्साको वीरगञ्ज सुक्खा बन्दरगाहको व्यवस्थापन र सञ्चालनको जिम्मेवारी भारतीय कम्पनी प्रिस्टिन मेगा लजिष्टिक पार्क प्रालिले पाएको छ। नेपाल इन्टरमोडल यातायात विकास समितिका कार्यकारी निर्देशक आशिष गजुरेलका अनुसार आउँदो पाँच वर्षका लागि चार अर्ब ७१ करोड रुपैयाँ लागतमा कम्पनी छनोट गरिएको हो।
समितिले आह्वान गरेको बोलपत्रको प्राविधिक मूल्याङ्कनमा कन्टेनर कर्पोरेशन अफ इन्डिया लिमिटेड र प्रिस्टिन मेगा लजिष्टिक पार्क प्रालि छनोटमा परेका थिए। कन्टेनर कर्पोरेशन अफ इन्डिया प्रालिले चार अर्ब ५१ करोड रुपैयाँ को बोलकबोल गरेको थियो, तर प्रिस्टिनको चार अर्ब ७१ करोड रुपैयाँ को प्रस्तावलाई अन्तिम रूपमा स्वीकृत गरिएको हो।
यसअघि पनि प्रिस्टिन मेगा कम्पनीले तीन अर्ब ३३ करोड लागतमा पाँच वर्षका लागि सुक्खा बन्दरगाह व्यवस्थापन र सञ्चालनको ठेक्का प्राप्त गरेको थियो। नयाँ सम्झौतापछि आउँदो साउनदेखि पाँच वर्षसम्म बन्दरगाहको व्यवस्थापन र सञ्चालनको जिम्मेवारी सोही कम्पनीले लिनेछ।
सन् २००० मा विश्व बैंकको ऋण सहयोगमा ८२ करोड रुपैयाँ लागतमा ५७ बिघा क्षेत्रफलमा फैलिएको वीरगञ्ज सुक्खा बन्दरगाह निर्माण गरिएको थियो। यस बन्दरगाहमा कार्गाे रेलमार्फत मात्रै मालसमान ल्याइने गरिएको छ। भारत सरकारको २० करोड रुपैयाँ लागतमा रक्सौलदेखि बन्दरगाहसम्म रेल लिङ्क निर्माण गरिएको थियो।
वीरगञ्ज सुक्खा बन्दरगाह भन्सार कार्यालयले चालू आर्थिक वर्षको आठ महिनामा ३२ अर्ब ३२ करोड रुपैयाँ राजस्व सङ्कलन गरेको छ। यो बन्दरगाह नेपाल-भारत व्यापारका लागि महत्वपूर्ण केन्द्र बिन्दु मानिन्छ।
सुक्खा बन्दरगाहको व्यवस्थापन र सञ्चालनका लागि प्रिस्टिन मेगा लजिष्टिक पार्क प्रालिलाई पुनः जिम्मा दिइएपछि नेपाल-भारत व्यापारिक सहकार्य अझ सुदृढ हुने अपेक्षा गरिएको छ।
