काठमाडौँ । नेपाल-भारतबीचको सम्बन्ध बिग्रिरहेको चर्चा चलिरहँदा भारतका लागि नेपालका राजदूत डा. शंकरप्रसाद शर्मा र भारत उत्तरप्रदेशका मुख्यमन्त्री योगी आदित्यनाथबीच भेटवार्ता भएको छ।
नेपालमा राजसंस्थावादीको आन्दोलनमा योगी आदित्यनाथको समर्थन रहेको अड्कलबाजी भइरहेको अवस्थामा उत्तरप्रदेशको राजधानी लखनउमा उनीहरूबीच भेटवार्ता भएको हो।
भेटवार्ताका क्रममा द्विपक्षीय व्यापार विस्तार र आर्थिक सहकार्य, धार्मिक तथा सांस्कृतिक पर्यटन प्रवर्द्धन, उच्च शिक्षा र छात्रवृत्तिको अवसरहरू, जलविद्युत् र अन्य ऊर्जा परियोजनामा सहकार्य, यातायात तथा कनेक्टिविटी सुधार, सीमा सुरक्षा, आपसी सहकार्य, र विकासका सम्भावनाबारे छलफल भएको हो। नेपालको वर्तमान परिस्थितिका बारेमा पनि छलफल भएको बुझिएको छ।
राजदूत शर्मा र मुख्यमन्त्री योगी आदित्यनाथबीच नेपाल-भारत सम्बन्धलाई थप मजबुद बनाउने विषयमा कुराकानी भएको बुझिएको छ।
नेपाली काँग्रेसको कोटाबाट राजदूत नियुक्त भएका शर्माले काँग्रेस सभापति शेरबहादुर देउवा र परराष्ट्रमन्त्री आरजु राणा देउवानिकट मानिन्छन्। परराष्ट्रमन्त्री देउवाले धेरै पटक प्रयास गर्दा पनि उच्चस्तरीय भेटघाटको संभावना नदेखिएकाबीच राजदूत शर्मा र योगीबीच भेटवार्ता भएको हो।
योगीसँगको भेटघाटका क्रममा राजदूत शर्माले नेपाल-भारत ऐतिहासिक मित्रतालाई अझ प्रगाढ बनाउन पहल गर्ने र द्विपक्षीय सहकार्य विस्तार गर्दै आपसी विकास र समृद्धिमा जोड दिने प्रतिवद्धता जनाएका छन्।
आपसी हित र समझदारीका विषयमा कुराकानी भए पनि राजनीतिक रुपमा सदासयता छ भन्ने देखाउन उक्त भेटवार्ता भएको भन्ने राजनीतिक वृत्तमा चर्चा छ। तर भारतको राजधानी नयाँ दिल्लीमा राजदूत शर्माले उच्चस्तरीय भटवार्ता गर्न नपाएको बताइएको छ।
