चितवन । जनता समाजवादी पार्टी नेपाल (जसपा) बागमती प्रदेश सचिव अजय निरालाले चैत १५ गते तीनकुनेमा भएको घटनाको सम्पूर्ण नैतिक जिम्मेवारी गृह प्रशासनले लिनुपर्ने बताएका छन्।

राजावादी आन्दोलनको क्रममा भएको घटनालाई लिएर उनले भने, “प्रहरीले समयमै अराजक भीड नियन्त्रण गरेको भए यो त्रासदीपूर्ण घटना हुनबाट रोक्न सकिन्थ्यो। यसको सम्पूर्ण नैतिक जिम्मेवारी गृह प्रशासनले लिनुपर्छ।”

निरालाले घटनाको निष्पक्ष छानबिन गरी संलग्न अपराधीहरूमाथि कडा कानुनी कारबाही गर्नुपर्ने मागसमेत गरेका छन्। उनले लोकतान्त्रिक मूल्य मान्यता, मानवअधिकार र राष्ट्रिय एकताको पक्षमा जसपाको प्रतिबद्धता दोहोर्याउँदै कुनै पनि षड्यन्त्र, हिंसा वा अराजकताको कडा शब्दमा निन्दा र भर्त्सना गरेका छन्।

“सङ्घीय लोकतान्त्रिक गणतन्त्रको चरित्रविपरीत केही अधिकारीहरूले प्रदर्शनकारीलाई उक्साउने भूमिका खेलेको देखिएको छ,” उनले आरोप लगाए। जनताको आक्रोश बुझ्न र यसको शान्तिपूर्ण समाधान खोज्नु राज्यको कर्तव्य भएको उनले उल्लेख गरे।

“हिंसा, प्रतिहिंसा, अराजकता वा लोकतान्त्रिक मूल्य मान्यता विरोधी गतिविधिलाई कसैले बहाना बनाउन सक्दैन, न त बनाउन दिनुपर्छ। हामी सबै नेपालीलाई संयम, सहिष्णुता र विधिको शासन कायम गर्न आग्रह गर्दछौँ,” निरालाले भने।

तीनकुने घटनालाई लिएर विभिन्न राजनीतिक वृत्तबाट तीव्र प्रतिक्रिया आइरहेको बेला जसपा नेता निरालाले राज्य संयन्त्रको भूमिकामाथि प्रश्न उठाएका छन्। यस घटनासँग सम्बन्धित सम्पूर्ण पक्षलाई कानुनी कठघरामा ल्याउनुपर्ने उनको धारणा छ।