वीरगंज | सामुदायिक प्रहरी साझेदारी कार्यक्रम अन्तर्गत वीरगंज महानगरपालिकाको कार्यालय, नेपाल विद्युत् प्राधिकरण वीरगंज, र ग्रीन सिटी सामुदायिक प्रहरी सेवा केन्द्र आदर्शनगरको संयुक्त आयोजनामा मंगलबार बिहान ७:४५ बजेदेखि नगर सौन्दर्यीकरण तथा आगलागी न्युनिकरण अभियान सञ्चालन गरिएको छ।
जिल्ला पर्साको वीरगंज महानगरपालिका वडा नं. १० अन्तर्गत आदर्शनगर चौकदेखि घडिअर्वा पोखरी, पशुपति घोषदेखि दक्षिण आदर्श स्कूल, तेल मिलदेखि स्वीमिङ पुल, र ग्रीन सिटी पूरानो कपडा बैंकदेखि ठाकुर राम बहुमुखी क्याम्पससम्मको क्षेत्रमा कार्यक्रम सञ्चालन गरिएको हो।
गर्मी याममा आगलागीबाट बच्न तथा विद्युत् पोलमा टाँसिएका बिरुवाका हाँगाहरू कटान गरी जोखिम न्यूनीकरण गर्ने उद्देश्यले अभियान चलाइएको आयोजकहरूले बताएका छन्। साथै, नगर क्षेत्रको सौन्दर्यीकरणमा टेवा पुर्याउने लक्ष्य राखिएको छ।
कार्यक्रम ग्रीन सिटी सामुदायिक सेवा केन्द्र आदर्शनगर वीरगंजका अध्यक्ष जय प्रकाश खेतानको अध्यक्षतामा सम्पन्न भइरहेको छ। आयोजक संस्थाहरूले स्थानीय बासिन्दा, स्वयंसेवक तथा सरोकारवालाहरूको सहभागितालाई पनि स्वागत गरेका छन्।
