बारा। बाराको सिमरामा तालिम सञ्चालनको नाममा युवाहरूलाई ठगी गरेको तथ्य बाहिर आएको छ। नेटवर्किङ व्यापारको नाममा युवाहरूलाई आर्थिक ठगी गरेको आरोप लागेपछि पीडितहरूले प्रहरीमा उजुरी दिएका छन्।

जीतपुरसिमरा उपमहानगरपालिका-२ सिमरामा युनिभर्सल भिजनरी युथ इन्टरप्रेनरर्स नामक संस्थामार्फत ठगी भएको खुलासा भएको छ। पीडितहरूबाट उजुरी परेपछि बारा प्रहरीले अनुसन्धान सुरु गरेको हो।

ठगी गरेको आरोपमा इलाका प्रहरी कार्यालय सिमराले चार जनालाई पक्राउ गरेको छ। पक्राउ पर्नेहरूमा सुमित पटेल (जीतपुरसिमरा उपमहानगरपालिका-३) सुमन साह (बीरगञ्ज महानगरपालिका-२२) आर्यनकुमार दास (बीरगञ्ज महानगरपालिका-२३) रिता सुनार (नवलपरासी, कावासोती नगरपालिका-१४)

प्रहरीका अनुसार युनिभर्सल इन्टरप्रेनरर्स समूहले सामाजिक सञ्जाल फेसबुकमा ग्रुप बनाउने, युवाहरूलाई नेटवर्किङ व्यापारमा संलग्न गराउने, तालिमको नाममा शुल्क असुल्ने, र विभिन्न वस्तुहरूको प्रत्यक्ष व्यापार गराउने गरेको प्रारम्भिक अनुसन्धानमा खुलेको छ।

सिमरास्थित साना किसान कृषि सहकारी डुमरवाना को भवनमा २०७९ मंसिर १ गतेदेखि कार्यालय सञ्चालन गरेको पाइएको छ। सोही कार्यालयबाट पक्राउ परेका सुमित पटेल संस्थाको सिमरा शाखा प्रमुख रहेको खुलेको छ।

ठगी आरोपमा परेका समूहले विभिन्न व्यक्तिहरूबाट ७ लाख ५५ हजार रुपैयाँ ठगेको उजुरी परेको छ। ठगीमा परेको बताइएका केही व्यक्तिहरू यस्ता छन्: प्रदीप पटेल (बीरगञ्ज-२८) – १ लाख ५० हजार राम उजैन कुशवाहा (रौतहट) – ९० हजार लालबाबु कुशवाहा (बीरगञ्ज-२२) – ९० हजार निकेशकुमार कुशवाहा (पर्सा) – ५५ हजार संदिप यादव (पर्सा) – २ लाख ८० हजार रमेशकुमार बैठा (बारा) – ९० हजार उपेन्द्र पासवान (पर्सा) – ९० हजार

पीडितहरूको उजुरीका आधारमा इलाका प्रहरी कार्यालय सिमराले जिल्ला अदालत बाराबाट पाँच दिनको म्याद लिएर अनुसन्धान गरिरहेको प्रहरी नायब उपरीक्षक शुभद्रा वाइबाले जानकारी दिइन्।

यस संस्थाले युवाहरूलाई सदस्य बन्न प्रेरित गर्ने, तालिमका नाममा शुल्क असुल्ने, र व्यापारमा संलग्न गराउने जस्ता गतिविधि सञ्चालन गरिरहेको आरोप छ।

२०७९ चैत्रमा कम्पनी रजिष्टारको कार्यालयमा दर्ता भएको यूनिभर्सल युथ भिजनरी इन्टरप्रेर्नस प्रा.लि. को मुख्य कार्यालय चितवन, भरतपुर मा रहेको कम्पनीका सञ्चालक मिलन श्रेष्ठले बताएका छन्।

प्रहरीले अनुसन्धान जारी राखेको छ भने पीडितहरूले ठगीमा संलग्न सबै दोषीलाई कानुनी कारबाही गर्न माग गरेका छन्।