धनगढी | चालु आर्थिक वर्षको सात महिनाको अवधिमा सुदूरपश्चिममा अपराधका दुई हजार घटना प्रहरीमा दर्ता भएका छन्। सो अवधिसम्म विभिन्न प्रकृतिका दुई हजारभन्दा बढी अपराधका घटना प्रहरीमा दर्ता भएको अभिलेख छ। प्रदेश प्रहरी कार्यालय धनगढीका अनुसार सबैभन्दा बढी सामाजिक अपराधका घटना घटेका छन्। त्यस्तै, संगठित तथा आर्थिक अपराधका घटनाको संख्या पौने चार सय पुगेको छ। साथै देहत्यागत तथा ज्यानसम्बन्धी अपराधका घटना तीन सयभन्दा बढी दर्ता भएका छन्।

प्रदेशका नौवटै जिल्लामा गरी विभिन्न प्रकृतिका दुई हजार १७ घटना घटेका छन्। सामाजिक अपराधका ४ सय ४०, सार्वजनिक हित, स्वास्थ्य, सुरक्षा, सुविधा र नैतिकता विरुद्धका २५२, भेदभाव तथा अपमानजन्य व्यवहार सम्बन्धी १६५, आपराधिक प्रवेश तथा आपराधिक उपद्रव सम्बन्धी ८ तथा सार्वजनिक शान्ति विरुद्ध, नागरिकता र कुटपिट तथा अङ्गभङ्ग सम्बन्धी समान ५/५ कसुर प्रहरीमा दर्ता छन्।

प्रहरीमा सबैभन्दा बढी ३०५ उजुरी लागुऔषध मुद्दाको रहेको छ भने हातहतियार खरखजाना सम्बन्धी ११ तथा अपहरण वा शरीर बन्धक सम्बन्धी १ कसुरमा दर्ता भएको छ। सो अवधिसम्म देहत्यागतका ३२४ घटना दर्ता भएका छन् भने ज्यान सम्बन्धी कसुरका तीन सय घटना घटेको तथ्याङ्क छ।

भवितव्य ज्यानका १३२, फुटकर ज्यानका ८५, ज्यान मार्ने उद्योग ४१, कर्तव्य ज्यान कसुरका २४, आत्महत्या गर्न दुरुत्साहन गरेको १५ तथा गर्भ संरक्षण विरुद्धको कसुरमा ३ घटना घटेको प्रहरीको तथ्याङ्कले देखाएको छ। महिला तथा बालबालिका सम्बन्धी १८६ घटना प्रहरीम दर्ता भएको प्रदेश प्रहरी कार्यालयले जनाएको छ। जसमध्ये सबैभन्दा बढी जबरजस्ती करणीका एक सय र जबरजस्ती करणी उद्योगका ३२ वटा घटना घटेका छन्।

बहुविवाह ३७, बालविवाह, मानव बेचबिखन तथा ओसारपसार र यौन दुराचारका समान ५/५ घटना घटेका छन् भने बाल यौन दुराचारका २ घटना प्रहरीमा दर्ता भएका छन्। प्रहरीले विविध अपराध शिर्षकमा १७४ घटना घटेको जनाएको छ। जसमा बैङ्किङ कसुरका सबभन्दा बढी १४३ घटना प्रहरीमा दर्ता भएका छन्।

सवारी सम्बन्धी १०९, सवारी ज्यान ६६, सवारीबाट भवितव्य ३४ र सवारी अङ्गभङ्गका ७ वटा घटना घटेको पाइएको छ। यसका साथै चोरी सम्बन्धी ९९, साधारण चोरी ७५, नकबजनी चोरी १० तथा डाका चोरी र सवारी चोरी समान ७÷७ घटना प्रहरीमा दर्ता भएका छन्। यस्ता अपराध सबैभन्दा बढी कैलाली र त्यसपछि कञ्चनपुरमा घटेको पाइएको छ।