धनगढी | धार्मिक महत्व बोकेको धनगढी उपमहानगरपालिका–१६ रामपुरस्थित बेहडाबाबा मन्दिरमा महाशिवरात्रिका अवसरमा हेलिकप्टरद्वारा पुष्प वर्षा र सवा दुई करोड दीप प्रज्वलन गरिने भएको छ।

बेहडाबाबा फाउन्डेसन, मन्दिर व्यवस्थापन समिति र बेहडाबाबा पुष्प वर्षा समारोह उपसमितिको आयोजनामा माहाशिवरात्रिको अवसरमा पुष्प वर्षा र सवा दुई करोड दीप प्रज्वलन गरिन लागेको हो। महाशिवरात्रि तथा सवा दुई करोड दीप प्रज्वलन कार्यक्रमको तयारी पूरा भएको आयोजक बेहडाबाबा फाउन्डेसन तथा मन्दिर व्यवस्थापन समितिका अध्यक्ष पद्मराज जोशीले बताए। “हरेक वर्ष आयोजना गरिने महाशिवरात्रि मेलामा पहिलो पटक हेलिकप्टरबाट पुष्प वर्षा गरिन लागिएको छ। यो वर्ष सवा दुई करोड दीप प्रज्वलन गर्ने कार्यक्रम पनि राखिएको छ। शिवरात्रि आयोजनाको सम्पूर्ण तयारी पूरा भएको छ,“ जोशीले भने।

अध्यक्ष जोशीले कैलालीको प्रसिद्ध धार्मिकस्थल मानिने बेहडाबाबालाई पर्यटकीय गन्तव्य बनाउनका लागि प्रचारप्रसार गर्न हेलिकप्टरबाट पुष्प वर्षा गराउन लागिएको बताएका छन्।

शुक्रवार महाशिवरात्रिको दिन बिहान ११ देखि मध्याह्न १२ बजेको समयमा हेलिकप्टरबाट पुष्प वर्षा गराइने र अपराह्न ४ बजे सवा दई करोड दीप प्रज्वलन गरिने जोशीले बताएका छन्।

पुष्प वर्षा कार्यक्रमका लागि नरेन्द्र शाहको संयोजकत्वमा रहेको टोलीले १४ लाख नौ हजार नौ सय ५० रकम सङ्कलन गरिसकेको छ। पुष्प वर्षाका लागि हेलिकप्टर भाडाबापत ११ लाख र तीन क्वीन्टलटल फूलका लागि दुई लाखसहित जम्मा १३ लाख खर्च हुने अनुमान आयोजकले गरेको छ।

पुष्प वर्षासँगै महाशिवरात्रिमा भक्तजनका लागि महाभण्डारासमेत चलाउने र उपस्थित सम्पूर्ण भक्तजनलाई निःशुल्क खाना र पानीको व्यवस्था गरिने बताइएको छ। बेहडाबाबा धाममा भक्तजनलाई जान आउनदेखि दर्शन तथा पूजापाठ गर्नसम्मका लागि सम्पूर्ण तयारी गरिएको छ। आवतजावतका लागि बसको व्यवस्था साथै कडा सुरक्षाकोेसमेत व्यवस्था गरिएको छ। सुरक्षाका लागि नेपाल प्रहरी, सशस्त्र प्रहरी, नगर प्रहरी तथा स्वयंसेवक परिचालन गरिने मन्दिर व्यवस्थापन समितिले जनाएको छ।

धनगढी उपमहानगरपालिकाले शिवगङ्गा नदीदेखि मन्दिरसम्मको सडक रोलर लगाएर आवतजावत गर्न सहज हुने बनाएको तथा मन्दिर दर्शन गर्न आउने भक्तजनले पार्किङ शुल्क तिर्न नपर्ने व्यवस्था मिलाइएको मन्दिर व्यवस्थापन समितिका अध्यक्ष जोशीले बताएका छन्।

बेहडाबाबा मन्दिरमा लाग्ने महाशिवरात्रिमा दर्शन तथा पुजाका लागि बिहान चारबजेदेखि मन्दिरका चार वटै ढोका खुला गरिने मुल पुजारी ओमप्रकाश जोशीले बताए। बेहडाबाबा मन्दिरमा छिमेकी मुलुक भारतबाटसमेत दर्शनार्थी आउने गरेका छन् । बेहडाबाबा मन्दिरको दर्शनका लागि भारतका लख्खीमपुर, पलिया, पिलीभित, युपी, उत्तराखण्डलगायत विभिन्न क्षेत्रबाट भक्तजन आउने गरेको मन्दिर व्यस्थापन समितिका अध्यक्ष जोशीले बताए।