वीरगंज | काठमाडौं उपत्यकाका सरकारी कार्यालयका कर्मचारीहरूले चन्दाआतंकबाट पीडित बनेको गुनासो गरेका छन् । विभिन्न दलका भ्रातृ संगठनहरूले चन्दा माग्दै धम्क्याउने गरेको उनीहरूको भनाइ छ ।

केही समूहले पैसा नदिए मोसो दल्नेदेखि दुर्व्यवहारसम्म गरेका छन् । यसमा मोहन वैद्य नेतृत्वको नेपाल कम्युनिस्ट पार्टीका कार्यकर्ताहरू प्रमुख छन् । उनीहरूले पैसा नदिनेलाई दुर्व्यवहार गर्दै आएका छन् ।

यातायात व्यवस्था विभागका महानिर्देशक उद्धवप्रसाद रिजाल, दुग्ध विकास संस्थानका महाप्रबन्धक सञ्जीव झा र प्राविधिक शिक्षा तथा व्यावसायिक तालिम परिषद् (सिटिइभिटी)का उपाध्यक्ष खगेन्द्र अधिकारीमाथि मोसो दल्दै दुर्व्यवहार भइसकेको छ ।

अरू धेरै कार्यालयका कर्मचारीले चन्दा माग्दै धम्की दिएको भन्दै प्रहरीमा उजुरी गरेका छन् । प्रहरीले यस्ता घटनामा संलग्न सन्तोष परियार र दीपेन्द्र परियारलाई पक्राउ गरी अनुसन्धान गरिरहेको छ । मोसो दल्ने कतिपय फरार छन् । केही पक्राउ परे पनि पैसा माग्ने क्रम रोकिएको छैन ।