सर्लाही । प्रहरीले १० पोका रिफाईन गाँजाको प्याकेट सहित सर्लाहीबाट एक जनालाई पक्राउ गरेको छ । जिल्ला प्रहरी कार्यालय सर्लाहीले निजि कारमा लुकाई छिपाई तस्करी गर्ने क्रममा गाँजको प्याकेट सहित एक जनालाई पक्राउ गरेको हो ।
सर्लाही प्रहरी प्रमुख एसपी दयानिधी ज्ञवालीका अनुसार सर्लाहीकाे बागमती नगरपालीका- ३ नयाँ बस्ती चोक स्थित नयाँरोड बरहथवा सडक खण्डमा गोप्य सूचनाको आधारमा दक्षिणबाट उत्तरतर्फ आई रहेको बागमती प्रदेश ०१-०२६ च ५१५९ नम्वरको कारलाई चेकजाँच गर्दा कार भित्र लुकाई छिपाई ल्याएको १० पोका गाँजा बरामद भएकाे छ।
एसपी ज्ञवालीका अनुसार पक्राउ पर्नेमा पूर्वी नवलपरासी गैँडाकोट नगरपालिका-११ बस्ने बर्ष ३० का कार चालक सूर्य परियार छन् । एसपी ज्ञवालीले भने, ‘जिल्लामा तस्करीको नयाँ नयाँ तरिका अपराधीक गिरोहले लागुऔषध तस्करी गर्दछ भन्ने थियो, सोही आधारमा हामीलाई निजी कारबाट लागुऔषध तस्करी हुँदैछ भन्ने खवर आयो, हेर्दा राम्रो प्याकमा १ सय १६ किलो ग्राम रिफाईन गाँजा फेला पर्यो ।’पक्राउ परेकालाई प्रहरीले नियन्त्रणमा लिई लागुऔषध ऐन २०३३ अन्तर्गत म्याद थप गरि थप अनुसन्धान गरिने जिल्ला प्रहरी कार्यालय सर्लाहीले जनाएको छ ।
