वीरगंज । वीरगन्जको सर्राफ मार्केटमा रहेको दैनिक बचत तथा ऋण सहकारी संस्था लिमिटेडविरुद्ध निक्षेपकर्ताहरूले प्रशासनमा उजुरी दिएका छन् । सहकारीमा जम्मा गरेको निक्षेप रकम फिर्ता गर्न सहकारीका सञ्चालकहरूले आनाकानी गरेपछि बचतकर्ताहरूको एक समूहले सोमबार जिल्ला प्रशासन कार्यालय पर्सामा उजुरी दिएको हो ।
पर्साका सहायक प्रमुख जिल्ला अधिकारी (सहायक सिडिओ) शिव प्रसाद लम्साललाई दिएको उजुरीमा बचतकर्ताहरूले सहकारीका सञ्चालक रुपेश पटेललाई उपस्थित गराएर बचतको रकम फिर्ता गराउन सहयोग गर्न आग्रह गरेका छन् । बचतकर्ताहरूको उजुरीका आधारमा लम्सालले सञ्चालक पटेललाई उपस्थित गराउन जिल्ला प्रहरी कार्यालय पर्सालाई सोमबार नै पत्राचार पनि गरेका छन् । सहकारी सञ्चालक पटेलले महिनौँदेखि पैसा फिर्ता नगरेको बचतकर्ताहरूको गुनासो छ । उनीहरूका अनुसार सहकारीले झन्डै एक सय निक्षेपकर्ताको डेढ करोडभन्दा बढी रकम फिर्ता गरेको छैन ।
‘दैनिक बचतबाट मलाई डेढ लाख रुपैयाँ फिर्ता लिनुपर्ने छ,’ बचतकर्ता उमेश बरनवालले भने, ‘पछिल्लो ६ महिनादेखि सहकारीको कार्यालय धाइरहेको छु तर सञ्चालकहरूले रकम फिर्ता गरेका छैनन् ।’बरनवालका अनुसार पछिल्लो दुई महिनादेखि सहकारीको कार्यालय पनि बन्द छ । ‘सञ्चालक रुपेश पटेललाई फोन गर्दा उनले उठाउँदैनन् । फोन उठाए पनि मसँग जुन बेला पैसा हुन्छ फिर्ता गर्छु, तपाईँलाई जे गर्नु छ गर्नुस् भनेर उल्टै धम्की दिने गरेका छन्,’ बरनवालले थपे, ‘आज बाध्य भएर हामीले उजुरी दिनुपरेको छ ।
’बरनवाल जस्तै सहकारीमा बचतकर्ताहरूको ५० हजारदेखि २० लाख रुपैयाँसम्म जम्मा छ । प्रहरीले सहकारीबाट पैसा फिर्ता निकाल्न सहयोग गर्ने बचतकर्ताहरूको विश्वास छ । बचतकर्ताले गरेको गुनासोका विषयमा बुझ्न सहकारी पुग्दा कार्यालयको मूल ढोकामा ताल्चा लगाइएको थियो । सञ्चालक रुपेश पटेललाई (९८०९१४०९२४) मा पटक–पटक सम्पर्क गर्दा सम्पर्क हुन सकेन । दैनिक बचत तथा ऋण सहकारी संस्था लिमिटेडको केन्द्रीय कार्यालय ललितपुर महानगरपालिकास्थित कुमारीपाटीमा छ । मधेसखबरबाट साभार गरिएको छ।
