वीरगंज । पूर्वपश्चिम महेन्द्र राजमार्गको नारायणगढ पुल्चोकदेखि भरतपुर गोन्द्राङसम्म ६ किलोमिटर सडकलाई ६ लेनको बनाउने काम समयमा नसकिँदा नारायणगढ भरतपुर बजार क्षेत्रको व्यापार व्यवसायमा असर परेको छ । सडक विस्तारका लागि बाटो खनेर चाँडो काम नगर्दा आडमा रहेको पसलमा व्यवसाय गर्न गाह्रो भएको व्यवसायीहरू गुनासो गर्छन् । उक्त सडक विस्तारको काम गत फागुन १० मै सकिनुपर्ने थियो । तर म्याद थपेर आगामी मंसिर २३ सम्म पुर्याए पनि सडक विस्तारको हालसम्मको प्रगति ७० प्रतिशत मात्रै छ । नारायणगढ बजार क्षेत्रमा सर्भिस लेनका लागि सडक खनेर बाँकी काम सुरु नगर्दा व्यवसायीहरू ठूलो मर्कामा परेको चितवन उद्योग वाणिज्य संघका तृतीय उपाध्यक्ष श्रीष पन्तले बताए । नारायणगढको व्यस्त क्षेत्र मानिने सहिद चोक नजिकको कँडेल पुस्तक पसलका सञ्चालक रामशरण सिलवाल व्यापार व्यवसायमा ६० प्रतिशत कमी आएको बताउँछन् । पसलको पेटीसम्मै सडक कार्यालयले बनाएको खाल्डो छ । ‘उही चिनेजानेका साथी भाइ र पुराना ग्राहकहरू खोज्दैखोज्दै आए भने हो । नभए सामान्य ग्राहक पसलसम्म आउनै गाह्रो हुने गरेर सडक कार्यालयले बाटो खनेको छ । व्यापार चौपट भयो,’ सिलवासलले गुनासो गरे । सर्भिस लेनका लागि खनेको ठाउँमा पानी पर्दा ठूलो ताल हुने र अलि घाम लागे धुलो उडेर बस्नै नसकिने उनले बताए । गत वर्षदेखि नै व्यापारमा असर परेको हुँदा व्यवसायीको अवस्था नाजुक हुँदै गएको उनको भनाइ छ । सडक विस्तारका लागि गत वर्षको पुसमा सडक सिमाभित्र परेका घरहरू भरतपुरको डिभिजन सडक कार्यालयले हटाएको थियो ।
घर भत्काएपछि बजार नै कुरुप र युद्धग्रस्त क्षेत्र जस्तो डर लाग्दो भएको थियो । त्यसलाई मिलाएर भ्याउँदा नभ्याउँदै फेरि सर्भिस लेनका लागि सडक खनेर अर्को सकस थपेको व्यवसायीहरू बताउँछन् । सडक विस्तारका क्रममा वर्ष दिन जति नै व्यापार ठप्प हुने अवस्था आएको पन्तले बताए । ‘सडक विस्तारको काम पनि सुस्त हुँदै गएको छ । यसले गर्दा व्यापारीलाई मर्कामाथि मर्का थपिँदै जाने खतरा देखिएको छ,’ पन्तले भने । संघले चितवनका प्रमुख जिल्ला अधिकारी, डिभिजन सडक कार्यालयका प्रमुख, भरतपुर महानगरपालिकाका मेयर र निर्माण व्यवसायीलाई पटकपटक ध्यानाकर्षण गराएको पनि उनले बताए । ‘हामी छिट्टै बजारवासीको भेला राख्दै छौं । आन्दोलन नै गर्नुपरे पनि हामी पछि हट्दैनौं,’ पन्तले भने । तीज, दसैं र तिहारमा व्यापार होला भन्ने आशामा बसेका व्यवसायीहरू निराश भएको उनले बताए । ‘घर भाडा तिर्न, बैंक ब्याज र किस्ता तिर्न र कामदार कर्मचारीको तलब लगायत अन्य खर्च धान्न कम्तीमा पनि चाडबाडको मुखमा व्यापार गरौंला भन्ने आसमा बसेकाहरू निराश छन्,’ पन्तले भने । पूर्वी चितवन र जिल्लाका अन्य भागबाट आउने गाडीहरूलाई निर्माणको बहानामा बजार आउन रोक्दा व्यापारमा झनै संकट थपिएको उनले बताए ।
भरतपुरको डिभिजन सडक कार्यालयका प्रमुख रमेशप्रसाद पौडेलल नारायणगढ बजार क्षेत्रको सर्भिस लेनको काम अगाडि बढाउन वर्षाले समस्या पारेको बताए । ‘अरू कारणले विलम्ब भएको हैन । औजार उपकरण सबै छन् । चाहिने सामग्रीहरू पर्याप्त छन् । निर्माण व्यवसायी खटेकै छन् । तर सर्भिस लेनमा काम गर्न नपाएको वर्षा नरोकिएर नै हो,’ डिभिजन सडक कार्यालयका प्रमुख पौडेलले भने । बर्खा रोकिएको हप्ता दिनपछि काम सुरु गर्न सकिने उनले बताए । ‘हामीले सबबेस र बेसमा दुई दुई लेयर सामाग्री राख्छौं । कालोपत्रे तीन लेयरको हुन्छ । एक पटक सबबेस राखेपछि चार पाँच दिन कुर्नु पर्दछ । पानी पर्न लगातार हप्ता दिन रोकियो भने पहिलो लेयरको काम गरिहाल्छौं । त्यसपछि बाँकी काम अगाडि बढ्थ्यो । हामी बर्खा रोकियोस् भनेर बसेका हौं । पानी पर्दासम्म त कामै गर्न सकिँदैन,’ पौडेलले भने । चितवन उद्योग वाणिज्य संघका तृतीय उपाध्यक्ष श्रीष पन्त बर्खाका कारण काम गर्न नपाइने हो भने अहिले खनेको बाटो पुरेर दसैं तिहारसम्म व्यापार गर्न दिनुपर्ने माग गर्छन् । ‘नारायणगढ बजार क्षेत्रमै तीन हजार जति पसलहरू छन् । भरतपुरसम्म जोड्दा पाँच हजार जति पसल पुग्छन् । बाटोको कामले गर्दा अहिले ७५ प्रतिशत जति पसललाई असर गरेको छ । यो बीचमा २५ प्रतिशत जति सटर त खाली नै भएका छन्,’ पन्तले सुनाए ।
काममा भएको ढिलासुस्तीलाई छोप्न वर्षालाई बहाना बनाएको उनको आशंका छ । ‘बर्खामा काम गर्न सकिँदैन भन्ने थाहा त थियो होला नि अनि किन यस्तो अलपत्र पार्न बाटो खनेको ? अहिले काम सुरु गर्न नसक्ने हो भने खनेको ठाउँ पुरेर बर्खा सकिएपछि फेरि काम सुरु गर्न केही गाह्रो छ जस्तो त लाग्दैन,’ पन्तले भने । नारायणगढ बजार क्षेत्रमा सर्भिस लेनका लागि गएको साउनमा खन्ने काम भएको थियो । ६ किलोमिटर सडकलाई ६ लेनको बनाउन एक अर्ब २३ करोड रुपैयाँ खर्च हुँदै छ । सडकको भौतिक प्रगति ७० प्रतिशत भएको र ६७ प्रतिशत जति रकम निर्माण व्यवसायीलाई भुक्तानी दिइसकेको डिभिजन सडक कार्यालयका प्रमुख पौडेलले जानकारी दिए । यो वर्ष यो सडकका लागि भनेर पाँच करोड रुपैयाँ मात्रै बजेट छ । मूल्य वृद्धिसमेत गरेर अन्तिम भुक्तानी झन्डै ६० करोड रुपैयाँको हाराहारीमा दिनुपर्ने कार्यालय प्रमुख पौडेलले बताए । काम सकिने समय तीन महिना पनि बाँकी नरहँदा काम भने ३० प्रतिशत बाँकी छ । साथै बजेट पनि न्यून आएको हुँदा सडक विस्तारको काम सकिन समय पो लाग्ने हो कि भन्ने आशंका थपिँदै गएको चितवन उद्योग वाणिज्य संघका तृतीय उपाध्यक्ष श्रीष पन्तले बताए । त्यसैले दबाब दिन आवश्यक भएको उनले बताए । विस्तारको काम ०७७ सालको भदौमा सुरु भएर ३० महिनापछि ०७९ सालको फागुन १० मा सकिनुपर्ने सुरुको सम्झौता थियो । तर बिजुलीको पोल सार्न, खानेपानीको पाइपहरू व्यवस्थित गर्न र सडक सीमाभित्र परेका घरहरू हटाउन समय लागेका कारण फागुनभित्र काम सक्न नसकेर म्याद थप भएको सडक कार्यालय प्रमुख पौडेलले बताए । अहिले अन्य सबै काम पूरा भएका कारण विस्तारको काम लम्बिने अवस्था नरहेको उनको भनाइ छ ।
