वीरगंज । खुला नाकाको फाइदा उठाउँदै सिमावर्ती क्षेत्रका तस्करले प्रहरीसँगको मिलेमतोमा राजश्व छली गर्ने गरेका छन् । वीरगंज संजाललाई प्राप्त समाचार अनुसार बाराको सीमावर्ती क्षेत्रमा नेपाल प्रहरी र सशस्त्र प्रहरीको ‘सेटिङ’ मा अवैध तस्करी व्यापक रुपमा मौलाएको छ। बलिरामपुर र मुसहर्वा सिमानाकामा खटिएका सशस्त्र र नेपाल प्रहरीका स्थानीय युनिट प्रमुखहरुले तस्करलाई लाइन दिएर ‘मासिक असुली’ गर्ने गरेका छन् । यस क्षेत्रमा राजश्व छलीका सामान रोकेर सम्बन्धीत निकायलाई बुझाउनुको सट्टा तस्करलाई लाइन दिएर रकम असुल्न दुई प्रहरी बीच प्रतिस्पर्धा चल्ने गरेको छ । सशस्त्र प्रहरीको बोर्डर आउट पोष्ट बरैनियाकै आडबाट तस्करी हुँदा पनि सरोकारवाला निकाय कानमा रुइ हालेर चिर निद्रामा रहेका छन् । स्थानियका अनुसार बलिरामपुरमा जनपथतर्फ प्रहरी वरिष्ठ नायव निरिक्षकको कमाण्डमा रहेको चौकीले पनि तस्करीको रुट खुलाएर दैनिक लाखौं राजश्व चुहावट गराएका छन् ।

भारतीय प्रसिद्ध बजार रक्सौलबाट मुसहर्वा र बलिरामपुरको सिमानाका हुँदै प्रसौनीको बाटो रातको करिब ९ बजेदेखि बिहानको ४ बजेसम्म भन्सार छली गरेर लत्ताकपडा, पाउडर दूध, जुत्ताचप्पल, हार्डवेयर, इलेक्ट्रोनिक पार्टस, मोटरपार्टस, भारतीय ब्रान्डका सूर्तीजन्य पदार्थ रजनीगन्धा, स्पेयर पार्टस, भाँडाकुँडा, खाने तेल, चिनी लगायतका खाद्यान्न लगायत लाखौं मुल्यका सामग्रीहरु इ–रिक्सा, ट्याम्पु, मोटरसाईकल र साईकलको माध्यमबाट रातीराती खुलमखुल्ला तस्करी गरिरहेको स्थानियको भनाई रहेको छ । यस्तै, बलिरामपुर र मुशहर्वा नाकाबाट भारतका नामुद तस्करहरु बाराको बलीरामपुर र मुशर्हवाको नहरको बाटो हुँदै ईटियाहीको बाटो प्रयोग गर्दै बारा जिल्लाको परवानीपुर पशु हार्ट बजारमा दैनिक ५० देखी १ सय सम्म मासुजन्य राँगाभैंसी रातीको १२ बजे देखि ४ बजे सम्म तस्करहरुले पुरयाउने गरेको छ । भारत बिहारको विभिन्न ठाउँबाट खरिद गरेका मासुजन्य रोगी राँंगाभैंसी रातिको समयमा मुसहर्वा सिमानाकाबाट प्रहरीकै संरक्षणमा तस्करी गरिरहेको प्रत्यक्षदर्शीहरुले बताएका छन् । राँगाभैंसी तस्करहरुसंग गोटाको ५०० र डिउटी खर्च १०० लिने गरेको समाचार स्रोतको दाबी छ ।

भैंसी तस्करी गर्नेहरुमा बिरगंज १६ इनार्वा बस्ने रामायण साह, बिरगंज २, छबकैया बस्ने छठु मिया, भारत बस्ने सुकट मियाँ र भारत बस्ने एमामुल मियाँहरुले दिनहु भैंसी भारतबाट नेपाल भित्रियाउने गरेका छन्। तस्करीको भैसी परवानिपुर भैंसी बजारसम्म पुर्याउने गरेका छन । स्तै, सशस्त्र र नेपाल प्रहरीका स्थानीय युनिट प्रमुख हरुलाई प्रति ब्यपारी मासिक ६ हजार देखि १० हजार सम्म बुझाएर मुशहर्वा नाकाबाट,मुरारी महतो,खेना यादव,बिन्दा,सकिल,चन्दन,पन्डित,प्रेम,सुनेश,बिरेन्द्र,पवन,तर्केश्वर,अनवर, लगायतका तस्करहरुले साइकल मोटरसाईकलको माध्यामले कपडा, हार्डवेयर,सुर्तीजन्य पदार्थ ,कष्टमेटिक, किरानाका लागायत तस्करीका सामानहरु भित्र्याउने लाईन पाएका छन् ।

जनपथ प्रहरी तर्फ प्रहरी चौकी मुसहर्वाका वरिष्ठ नायव निरीक्षक (सई) बसन्त थापाले परिचालन गरेको घुमुवा प्रहरी जवान भुषन तुरहाले सेटिङ मिलाएर तस्करी गराउने देखि तस्करीका समान गन्तव्यसम्म सुरक्षित पुग्न स्कर्टिङ समेत गर्ने गरेको स्थानियबासीको आरोप छ । प्रहरी जवान तुरहा प्रहरी चौकी मुसहर्वाका वरिष्ठ सईको घुमुवा हुन तर जिल्ला र प्रदेश प्रहरी प्रमुख डिआईजीको नाममा समेत रकम उठाउने गरेको स्रोत बताउँछ । उनले तस्करहरुसँग सेटिङ गरेबापतको रकमबाट स्थानीय युनिट इन्चार्ज देखी जिल्ला र प्रदेश प्रहरी प्रमुखलाई समेत भाग पुर्याउने गरेको समाचार स्रोत बताउँछ । वरिष्ठ सई थापा लामो समयदेखि बारा र पर्सामा रहेका कारण उनको सबै ब्यापारीदेखि तस्करसंग नजिकको सम्बन्ध र उठबस भएको प्रहरीहरू नै बताउँछन् । उनी पर्साको जानकीटोला र लंंगडीमा रहेको बेला बालुवा र गिट्टी तस्करी गराएको निकै बदनाम प्रहरी हुन ।