वीरगंज । असार दोस्रो साताभित्र स्थानीय तहले बजेट ल्याइसक्नु पर्ने कानुनी व्यवस्था छ । तर, मधेस प्रदेशका ३६ वटा पालिकाले अझै बजेट ल्याउन सकेका छैनन् । समयमा बजेट नआउँदा दैनिक कार्यालय सञ्चालनमा समस्या देखिएको छ । बजेट नल्याउनेमा सप्तरीका सात, सिराहाका चार, धनुषाका चार, महोत्तरीको एक, सर्लाहीका चार, रौतहटका आठ, बाराका दुई र पर्साका छ पालिका छन् । वार्षिक बजेट नल्याउने पालिकाहरूमा विकास निर्माणका काम ठप्प छन् । कर्मचारीहरूले तलब पाएका छैनन् । भदौ दोस्रो सातासम्म पनि बजेट ल्याउन नसक्नुको मुख्य कारण गाउँ तथा नगर सभामा राजनीतिक दलबिचको किचलो तथा प्रमुख र उपप्रमुखबिचको मनमुटाब देखिन्छ । धनुषाको मिथिला नगरपालिकामा जनप्रतिनिधिको टकराबले बजेट ल्याइए पनि कार्यान्वयनमा आउन सकेको छैन । मेयर महेन्द्र महतो र उपमेयर सुनितासिंह बुढाथोकीबिच मनमुटाब छ ।

मेयर महतो नेपाली काङ्ग्रेस र उपमेयर बुढाथोकी नेकपा एमालेबाट निर्वाचित छन् । उनीहरूबिच बोलचालसमेत छैन । मेयर महतोले साउन १७ मा बहुमत सदस्यको हस्ताक्षरबाट बजेट पारित गरे । तर, उपमेयरले बजेट कार्यान्वयन नगर्न साउन १८ मै उच्च अदालत जनकपुरमा मुद्दा दिइन् । अदालतबाट स्टेअर्डर जारी भएपछि बजेट कार्यान्वयन नभएको नगरपालिकाका एक कर्मचारीले बताए । बाराको सिम्रौनगढ नगरपालिकामा पनि मेयर र उपमेयरबिचको विवाद उत्कर्षमा रहेकाले नगर सभा हुन् सकेको छैन । उपमेयर नजमु शेहरले बजेट ल्याउन कुरा मिलाइरहेको बताइन् । कतिपय पालिकामा प्रमुख प्रशासकीय अधिकृत नभएकाले पनि बजेट ल्याउन सकस छ । प्रमुख प्रशासकीय अधिकृत रहेको र विना जानकारी लामो समयदेखि अनुपस्थित रहेकाले धेरै पालिकाले बजेट ल्याउन सकेका छैनन् । धनुषाको कमला नगरपालिकाले पनि लामो समय अधिकृत अनुपस्थित हुँदा बजेट ल्याउन सकेको छैन । कमलाका अधिकृत ओमप्रकाश महतो विगत डेढ महिनादेखि कार्यालयमा अनुपस्थित छन् ।

सप्तरीको राजविराज नगरपालिकाको हालत पनि कमला जस्तै छ । मेयर भीमराज यादव भ्रष्टाचार मुद्दामा दोषी ठहर भएपछि निलम्बनमा परेका छन् । अहिले उपमेयर इसरत परविनले नगरपालिकाको नेतृत्व सम्हालेकी छन् । उपमेयर परविनले हाकिम असारमै काठमाडौँ गएको र पछि उनको सरुवा भए पनि नयाँ हाकिम नआउँदा बजेट ल्याउन नसकेको बताउँछिन् । उनले भनिन्, ‘असार २४ मै हाकिम काठमाडौँ जानुभयो । हामीलाई जानकारी पनि दिनुभएन । सम्पर्क गर्दा आउने भने पनि चीन भ्रमणमा जानुभयो ।’आँखा पाक्ने रोगका कारण सिराहाको कल्याणपुर नगरपालिकाले बजेट ल्याउन सकेन । कल्याणपुरका मेयर राम पुकार साह भन्छन्, ‘आँखा पाकेपछि मलाई सञ्चो भएन । वडाध्यक्षका परिवारका सदस्यहरूको पनि आँखा पाक्यो । कर्मचारीले पनि सहयोग गरेन । त्यसैले अहिलेसम्म बजेट ल्याउन सकेनौँ ।’बजेट समयमै ल्याउनुपर्ने भए पनि समस्या भएको भन्दै उनले भदौभित्रै बजेट ल्याउने तयारी गरेको बताए । जनप्रतिनिधिहरूबिच विवाद नरहेकाले बजेट छिट्टै ल्याउने उनको दाबी छ ।

बजेट पेस नभएका पालिकाहरू:

१) कञ्चनरुप नगरपालिका, सप्तरी

२) राजविराज नगरपालिका, सप्तरी

३) हनुमाननगर कंकालिनी नगरपालिका, सप्तरी

४) छिन्नमस्ता गाउँपालिका, सप्तरी

५) महादेवा गाउँपालिका, सप्तरी

६) रुपनी गाउँपालिका, सप्तरी

७) बलान बिहुल गाउँपालिका, सप्तरी

८) कल्याणपुर नगरपालिका, सिराहा

९) औरही गाउँपालिका, सिराहा

१०) नवराजपुर गाउँपालिका, सिराहा

११) भगवानपुर गाउँपालिका, सिराहा

१२) मिथिला नगरपालिका, धनुषा

१३) औरही गाउँपालिका, धनुषा

१४) कमला नगरपालिका, धनुषा

१५) धनौजी गाउँपालिका, धनुषा

१६) सोनमा गाउँपालिका, महोत्तरी

१७) बलरा गाउँपालिका, सर्लाही

१८) हरिवन नगरपालिका, सर्लाही

१९) हरिपूर्वा नगरपालिका, सर्लाही

२०) चन्द्रनगर गाउँपालिका, सर्लाही

२१) गरुडा नगरपालिका, रौतहट

२२) कटहरी नगरपालिका, रौतहट

२३) गढीमाई नगरपालिका, रौतहट

२४) देवाही गोनाही नगरपालिका, रौतहट

२५) फतुवा विजयपुर नगरपालिका, रौतहट

२६) माधवनारायण नगरपालिका, रौतहट

२७) मौलापुर नगरपालिका, रौतहट

२८) यमुनामाई गाउँपालिका, रौतहट

२९) सिम्रौनगढ नगरपालिका, बारा

३०) आदर्श कोतवाल गाउँपालिका, बारा

३१) धोबनी गाउँपालिका, पर्सा

३२) पकाहा मैनपुर गाउँपालिका, पर्सा

३३) पर्सागढी नगरपालिका, पर्सा

३४) बिन्दवासिनी गाउँपालिका, पर्सा

३५) सखुवा प्रसौनी गाउँपालिका, पर्सा

३६) जिराभवानी गाउँपालिका, पर्सा