रौतहट । कुमार चन्दन । गरुडा नगर उद्योग वाणिज्य संघ, रौतहटको निर्वाचनमा दुईपक्षिय भिडन्त हुने भएको छ । गरुडा नगर उद्योग वाणिज्य संघको आउँदो यहि भदौ १८ गते हुने निर्वाचनमा अध्यक्ष पदका लागि दुई जना उम्मेदवार प्रतिस्पर्धामा उत्रिएका छन् । संघको अध्यक्ष पदमा उम्मेदवारी दिएका गरुडाका व्यापारी सतिश साह र संतोष कुमार चौधरीबीच कडा प्रतिस्पर्धा हुने भएको छ ।

यसअघि अध्यक्ष पदका लागि साह र चौधरी सहित चुनचुन साह, राजेश साह र राधेश्याम साह कलवार गरी पाँच जनाले उम्मेदवारी दिएका थिए । तर शुक्रवार अध्यक्ष पदमा उम्मेदवारी मनोनयन दर्ता गराएकामध्ये तिन जना चुनचुन साह, राजेश साह र राधेश्याम साह कलवार शनिवार आफ्ना उम्मेदवारी फिर्ता लिएका छन् । भदौ ९ गते शनिवार उम्मेदवारी फिर्ता लिने समय तोकिएको थियो । चुनचुन, राजेश र राधेश्याम आ–आफना उम्मेदवारी फिर्ता लिएपछि अब अध्यक्ष पदमा सतिश साह र संतोष कुमार चौधरीबीच भिडन्त हुने भएको छ । दुबै जना अध्यक्षका उम्मेदवार आ–आफ्ना स्थानबाट नेतृत्वमा अब्बल नै मानिन्छन् । बहुमत आफ्नो पक्षमा रहेको भन्दै दुबै जना आ–आफनो जित सुनिश्चित रहेको दाबी गरेका छन् । आफनो पक्षमा अपार बहुमत रहेकोले आफनो जित कसैले रोक्न नसक्ने अध्यक्षका उम्मेदवार संतोश कुमार चौधरीको दावी छ । चौधरीले पत्रकारहरुसंग कुरागर्दै अघि भने, मेरो जितको अवस्था सुनिश्चित छ । मलाई जिताउनका लागि सबै व्यापारी एकढिक्का भएर लागेका छन् ।

त्यस कारण म जित्छु भन्ने भान भएको छ । मलाई आर्थिक समृद्धिका बारेमा निकै अनुभव पनि छ । मेरो पक्षमा विगतका दिनदेखि महासंघलाई बुझेका निकै लामो समयदेखि जिम्मेवारीमा बसेका व्यक्तिहरू रहेका छन् । उनले अघि भने, ‘म व्यापारीको मर्म, भावना र समस्याहरू राम्रोसंग बुझेको छु । त्यसैले व्यापारीहरु मलाई अवश्य बहुमत दिएर विजयी गराउँछन, उनले भने, ।’ त्यस्तै अर्का उम्मेदवार सतिश साहले पत्रकारहरुसंगको कुराकानीमा भने, ‘यो चुनावमा मेरो जित निश्चित छ, किनभने विगत १२ वर्षदेखि मैले यस संस्थामा कार्यरत रही व्यापारीहरुको समस्या सुल्झाउँदै आएको छु । व्यापारीको पीडाहरूलाई कम गर्न लागि पनि मेरो उम्मेदवारी महत्वपूर्ण रहेको बताउँदै साहले आफु चुनाव जिते गरुडा नगरको समृद्धिमा कायापलट नै गर्ने बताए । एक अध्यक्ष र १३ जना सदस्य पदका लागि हुने निर्वाचनमा कुल ३३ जनाले चुनावी मैदानमा उत्रिएका छन् । भदौ १८ गते हुने संघको निर्वाचनमा कुल ९ सय ५२ जना मतदाता मतदान गर्न पाउने छन ।