वीरगंज । उपप्रधान तथा गृहमन्त्री नारायण काजी श्रेष्ठले लामो सङ्घर्ष पश्चात् प्राप्त भएको लोकतन्त्र र सङ्घीयतालाई कार्यान्वयन गर्दै जनतालाई त्यसको अनुभूति गराउन तर्फ वर्तमान सरकार केन्द्रित रहेको बताएका छन् । आइतबार वीरगन्जस्थित जिल्ला प्रशासन कार्यालय पर्साको नवनिर्मित भवनको उद्घाटन गर्दै गृहमन्त्री श्रेष्ठले लोकतन्त्र र सङ्घीयतालाई कार्यान्वयन गर्दै आम नेपाली जनतालाई त्यसको अनुभूति गराउन वर्तमान सरकारले सुशासन, समृद्धि र सामाजिक न्यायलाई मूल सूत्र बनाएर काम गरिरहेको बताए ।
उनले भने, ‘सम्माननीय प्रधानमन्त्री पुष्पकमल दाहालज्यूले कार्यभार सम्हालेको दिन घोषणा गरे अनुसार सुशासन, समृद्धि र सामाजिक न्यायलाई मूल सूत्र बनाएर वर्तमान सरकारले काम गर्नमा सरकारको ध्यान केन्द्रित छ । राज्यका सम्पूर्ण संयन्त्रलाई सोही अनुसार काम गर्न निर्देशन पनि दिएका छौँ ।’ यसमा हालसम्म सरकार सफल भए पनि अझै धेरै काम गर्न बाँकी रहेको उनको भनाई थियो । जनतालाई लोकतन्त्रको अनुभूति गराउन नियमित कामका लागि पनि घुस दिनुपर्ने, सोर्सफोर्स लगाउनु पर्ने अवस्थाको अन्त्य गर्न आवश्यक रहेको उनले बताए ।
‘अरू धेरै कुराभन्दा पनि जनतालाई राजनीतिक परिवर्तनको अनुभूति दिलाउन संविधान र कानुनअनुसार नियमित कामहरू गराउनु घुस खुवाउनु पर्ने, आर्थिक रूपले प्रभावित गर्नुपर्ने, दलाली र चाकरी गर्नुपर्ने स्थितिको अन्त्य गर्न जरुरी छ,’ उनले भने, ‘राज्य संयन्त्रका सम्पूर्ण निकाय यसमा गम्भीर हुनुपर्छ ।’ गृहमन्त्री श्रेष्ठले निजी क्षेत्रलाई प्रोत्साहित गर्दै आर्थिक विकासको सहभागी बनाउन जरुरी रहेको बताए । निजी क्षेत्रलाई साथमा लिएर नहिँडेसम्म समृद्धिको यात्रालाई निष्कर्षसम्म पुर्याउन नसकिने उनको भनाई थियो । पर्साका प्रमुख जिल्ला अधिकारी हिरालाल रेग्मीको अध्यक्षतामा भएको कार्यक्रमलाई वीरगन्ज महानगरपालिकाका मेयर राजेशमान सिंह, मधेस सरकारका राज्यमन्त्री रहबर अन्सारीलगायतले पनि सम्बोधन गरेका थिए ।
