वीरगंज । गौर हत्या काण्डका दोषीहरुलाई पक्राउ गरि कारबाहीको माग गर्दै आम विद्यार्थी मोर्चाले बाराको कलैयामा प्रदर्शन गरेको छ । साथै बाराका प्रमुख जिल्ला अधिकारी मार्फत प्रधानमन्त्रीलाई ज्ञापनपत्र पनि उसले बुझाएको छ । प्रभु साह नेतृत्वको आम जनता पार्टी निकटको आम विद्यार्थी मोर्चाले शुक्रबार कलैयामा विरोध जुलुश प्रदर्शन गर्दै जिल्ला प्रशासन कार्यालयमा पुगेर ज्ञापनपत्र पनि बुझाएको हो । रौतहटको गौरस्थित राइसमिल प्रांगणमा २०६३ साल चैत गते तत्कालीन मधेसी जनअधिकार फोरम र तत्कालीन नेकपा माओवादी बिच झडप हुदाँ माओवादीका २८ जना कार्यकर्ता मारिएका थिए ।

उक्त घटना गौर हत्या काण्डका नामले प्रचलित छ । उक्त हत्याकाण्ड भएको १७ वर्ष बितिसक्दापनि त्यसमा संलग्नहरुलाई अझैसम्म कारबाही गर्नुका सट्टा राज्यले नै संरक्षण गरेर राखेको आम विद्यार्थी मोर्चाको ठहर छ । त्यसकारण गौर हत्या काण्डका दोषीहरुलाई तत्काल पक्राउ गरि कारबाही गर्न र घटनामा मारिुएकाहरुको परिवारलाई क्षतिपुर्ति उपलब्ध गराउन माग गर्दै बाराका प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाइएको आम विद्यार्थी मोर्चाका बारा जिल्ला अध्यक्ष विकास कुशवाहाले बताए ।

हत्याकाण्डका दोषीहरुलाई कारबाहीको दायरामा नल्याइए अझ शसक्त आन्दोलनमा उत्रिने चेतावनीपनि दिइएको उनले जानकारी गराए । प्रदर्शन तथा ज्ञापनपत्र बुझाउने कार्यक्रममा आम विद्यार्थी मोर्चाका इन्चार्ज उमेश कुशवाहा, आम जनता पार्टीका बारा इन्चार्ज अशोक लामा , जिल्ला सचिव राजकिशोर साह ,आम विद्यार्थी मोर्चाका मधेस प्रदेश अध्यक्ष राकेश बैठा , सह इन्चार्ज दिपेन्द्र साह , आम जनता पार्टीका मधेस प्रदेश सदस्य संदेश साह, आइटी आर्मीका केन्द्रिय सदस्य सोनु कुशवाहा लगायतकोपनि सहभागीता थियो ।