वीरगंज । भक्तपुरमा पानी तान्ने मेसिन चलाउने क्रममा करेन्ट लागेर एक वृद्धाको ज्यान गएको छ ।
काभ्रेको चौरी देउराली गाउँपालिका-५ स्थायी घर भई हाल सुर्यविनायक नगरपालिका-४ बालकोट पानी ट्यांकी नजिकै डेरा गरी बस्ने ६१ बस्ने डुलमाया गौतमको करेन्ट लागेर मृत्यु भएको जिल्ला प्रहरी परिसर भक्तपुरका डिएसपी वसन्त पाठकले जानकारी दिए । स्थानीय लोकनाथ लुइँटेलको घरमा डेरा गरी बसेकी गौतम शुक्रबार बिहान ६:३० बजे भुइँतलामा रहेको मेसिनबाट पानी तान्न गएकी थिइन् ।
मेसिन चलाउँदा उनलाई करेन्ट लागेको थियो । करेन्ट लागेर घाइते भएकी उनलाई परिवारले थाहा पाएपछि तत्कालै मध्यपुर अस्पताल पुर्याएका थिए । तर उपचारको क्रममा अस्पतालले मृत भएको घोषणा गरेको थियो । घटनाबारे थप अनुसन्धान भइरहेको प्रहरीले जनाएको छ ।
