वीरगंज । हतकडीसहित फरार भएका बाराकाे जीतपुरसिमरा उपमहानगरपालिका १६ टांगियाबस्तीका सागर लामालाई प्रहरीले बिहिबार साँझ निजगढबाट पक्राउ गरेको छ । गत मंगलबार टांगियाबस्तीस्थित घरबाट बन्दुक र जंगली जनावरकाे दाँतसहित पक्राउ परेको केही समयमै फरार भएका ३५ वर्षीय लामालाई प्रहरीले बिहीबार साँझ निजगढबाट पक्राउ गरेको हो । बाराका प्रहरी उपरीक्षक होबिन्द्र बोगटीका अनुसार, आत्मसमर्पण गर्नका लागि निजगढ पुगेका लामालाई प्रहरीले निजगढबाट पक्राउ गरेको हो ।

प्रहरीले हतकडीसहित फरार रहेका लामालाई गोली हानेर नियन्त्रणमा लिन आदेश दिएपछि परिवारका सदस्य लामाको आत्मसमर्पणका लागि राजी भएको र त्यही अनुसार उनि निजगढ पुगेको प्रहरी उपरीक्षक बोगटीको भनाई छ ।लामालाई नियन्त्रणमा लिँदा हतकडी काटेको अवस्थामा रहेको बोगटीले जानकारी दिए । हतकडीसहित फरार भएका लामालाई नियन्त्रणमा लिन जिल्ला प्रहरी कार्यालय बाराले सादा पोशाकमा समेत प्रहरी परिचालन गरेको थियो ।

वन्यजन्तु चोरीशिकारीमा संलग्न रहेको सूचना पाएपछि ईलाका प्रहरी कार्यालय निजगढको टोलीले गत मंगलबार लामालाई टांगियाबस्तीस्थित उनकै घरबाट दुई राउण्ड गोली लोड भएको भरुवा बन्दुक र बाघको दाँत, रौं, नंग्रा जस्तो देखिने वस्तुसहित नियन्त्रणमा लिएको थियो । लामालाई नियन्त्रणमा लिने लिएर फर्कने क्रममा स्थानीयले प्रहरीमाथी आक्रमण गरेपछि उनि हतकडीसहित फरार भएका थिए । प्रहरीको बाटो छेकेर स्थानीयले ढुंगा प्रहार गर्न थालेपछि लामा उम्किन सफल भएका थिए ।त्यसक्रममा प्रहरी र स्थानीयबीच झडप भएको थियो भने प्रहरीले स्थिती नियन्त्रणमा लिन पाँच राउण्ड हवाई फायर समेत गरेको थियो ।स्थानीयसंग झडप हुँदा ईलाका प्रहरी कार्यालयमा कार्यरत बरिष्ठ प्रहरी नायब निरीक्षक कलमबहादुर शाही र प्रहरी सहायक निरीक्षक बलराम गिरी सामान्य घाईते भएका थिए ।