वीरगंज । नेकपा एमाले पर्साका युवा नेता अजय कुमार गुप्ताले आज चौथौँ दिन रानीघाटको कुमारीमाई टोलमा खानेपानी वितरण गरेका छन् । चापाकलहरू सुकेर पानीको हाहाकार भएसँगै जनजीवन नै कष्टकर भइरहेको बेला युवा नेता गुप्ताले आफ्नो व्यक्तिगत लगानीमा विगत चार दिनदेखि नि:शुल्क रूपमा पानी वितरण गरिरहेका छन् ।

गत स्थानीय तहको निर्वाचनमा वीरगञ्ज – १० मा नेकपाकै तर्फबाट वडाध्यक्षको प्रत्याशीसमेत रहेका गुप्ताले बिहीबार वीरगञ्जको रानीघाटस्थित कुमारीमाई टोलमा दश हजार लिटर पानी नि:शुल्क रूपमा वितरण गरेको जानकारी दिए । गुप्ताले यसअघि वीरगञ्जस्थित घडिअर्वा, रानीघाट, कुमारीलगायतको टोलमा पनि पानी वितरण गरेका थिए ।

चापाकलहरूमा पुनः नियमित ढङ्गले पानी नआएसम्म पानी वितरणलाई निरन्तर जारी राख्ने उनले प्रतिबद्धता पनि व्यक्त गरेका छन् । निर्वाचित जनप्रतिनिधिहरू ठेक्कापट्टा र कमाउनमा व्यस्त रहेको बेला जनतालाई आवश्यकता परेको खण्डमा पराजित भएर पनि गुप्ताले गरिरहेको सेवाको सबैले प्रशंसा गरिरहेका छन् । उनले पानीको आवश्यकता भएको परिवारलाई आफ्नो निजी नम्बर ९८४५१९१७१२ मा सम्पर्क गर्न आग्रह पनि गरेका छन् ।