वीरगंज । रौतहटको चन्द्रपुर नगरपालिका–१० चेतनगर बजारबाट लागूऔषधसहित दुई जना पक्राउ परेका छन् । प्रहरी चौकी चेतनगरबाट खटिएको टोलीले बिहीबार बिहान लागूऔषध गाँजासहित सर्लाही गडैता नगरपालिका–३ का ८ वर्षीय किसन ठाकुर र रौतहटको बृन्दावन नगरपालिका–९ का ३८ वर्षीय हरिन्द्र साहलाई पक्राउ गरेको हो ।

उनीहरुलाई १३ वटा प्लास्टिकको पुरियामा लागूऔषध गाँजा बेच्दै गरेको अवस्थामा पक्राउ गरिएको इलाका प्रहरी चन्द्रनिगाहपुरका डिएसपी एकनारायण कोइरालाले बताए । ‘पक्राउ परेका दुवै कारोबारी हुन् या सेवनकर्ता भन्ने अनुसन्धान सुरु गरेका छौं,’ उनले भने, ‘दुवैले बिक्रीका लागि राखेको हुनाले यथार्थ बुझ्न बाँकी छ ।’ सर्लाहीका ठाकुर चेतनगर बजारमा कपाल काट्ने सैलुन खोलेर बसेका थिए ।

पक्राउ परेका दुवैलाई लागूऔषधसम्बन्धी मुद्दामा अदालतबाट म्याद थपेर अनुसन्धान थालेको प्रहरीले जनाएको छ । घटनाबारे थप अनुसन्धान पनि भइरहेको डिएसपी कोइरालाले जनाए ।