वीरगंज । रामनिवास कुमार पटेल । ठाकुर राम बहुमुखी क्याम्पसमा अध्ययनरत पोखरिया नगरपालिका घर भएका विजय शर्माको सोमवार दुर्घटनामा मृत्यु भएको छ । ठाकुर राम क्याम्पसमा अध्ययनरत शर्मा सोमवार सिमरा कलेजबाट परीक्षा दिएर फर्कने क्रममा नितनपुरस्थित सडकखण्डमा दुर्घटनामा परी मृत्यु भएको प्रहरीले जनाएको छ । परीक्षा दिएर मोटरसाइकलमा आउने क्रममा नितनपुरमा उनी दुर्घटनामा परेको र उपचारको लागि नारायणी वयोधा अस्पताल ल्याउने क्रममा बाटोमा मृत्यु भएको हो । ठाकुर राम क्याम्पसका विद्यार्थीहरूले हिजै यसपटक पनि परीक्षा केन्द्र बाराको कलैया र सिमरामा राखिएकामा आपत्ति जनाउँदै विरोध गरेका थिए ।
सो क्रममा विद्यार्थी र प्रहरीबीच झडप भएको थियो भने आठ जना विद्यार्थीलाई प्रहरीले नियन्त्रणमा लिएको थियो । विद्यार्थीहरूले होम सेन्टरको माग गर्दै आएका छन् तर केही वर्षदेखि यहाँको परीक्षा सिमरा र कलैयामा लिइँदै आइएको छ । टाढा आवतजावतमा समस्या हुने भन्दै परीक्षा केन्द्रको विरोध भइरहेका बेलामा आज यो दुर्घटना भएर एकजना विद्यार्थीको मृत्यु भएको हो । घटनाको विरोधमा ठाकुर राम बहुमुखी क्याम्पसको संयुक्त विद्यार्थी सङ्गठनले प्रदर्शन गरेको छ । क्याम्पस प्रशासनविरुद्ध ठाकुर राम बहुमुखी क्याम्बसबाट जुलुस निकालेर नगरपरिक्रमा गरिएको थियो । सो क्रममा आक्रोशित विद्यार्थीहरूले बजार बन्द गराएका थिए ।
क्याम्पस प्रमुख मुर्दाबाद, क्याम्पस प्रशासन मुर्दाबाद भन्दै सहभागी विद्यार्थीहरूले होम सेन्टर नराखेका कारण विद्यार्थीको दुर्घटनामा मृत्यु हुन गएको बताए । विद्यार्थी नेता पवन यादवले ठाकुर राममा अध्ययनरत विद्यार्थीहरू सबै सक्षम नभएका र आर्थिक अवस्थाले गर्दा वीरगंजबाहिर केन्द्रमा गएर परीक्षा दिन नसक्ने हुँदा वीरगंज महानगरमैं परीक्षा केन्द्र हुनुपर्ने आफूहरूको मागविपरीत सिमरा र कलैयामा परीक्षा केन्द्र राखिएका कारण आज दुर्घटना भएको बताए । संयुक्त विद्यार्थी सङ्गठनले विज्ञप्ति प्रकाशित गरेर आज असार २६ गते वीरगंजका सम्पूर्ण शैक्षिक संस्था बन्द घोषणा गरेका छन् ।
