वीरगंज । वीरगन्ज महानगरपालिकाले शहरकाे मुख्य नालामाथि नै बनाईएकाे हरिखेतान बहुमुखि क्याम्पसकाे भवनसहितकाे संरचना डाेजर लगाएर भत्काएकाे छ।शहरकाे मध्य भाग भएर बग्ने ४० फिटे नाला माथि नै क्याम्पसले निर्माण गरेको भवनसहितकाे संरचना साेमबार महानगरपालिकाले डोजर लगाएर भत्काएकाे हाे ।नाला अतिक्रमण गरि बनाइएकाे संरचना हटाउन साेमबार दिउँसो मेयर राजेशमान सिंह आफैं डोजर लिएर पुगेका थिए ।
क्याम्पसको संरचना मुख्य नालामाथी निर्माण हुँदा नाला सफाईमा अवरोध भएकाले निर्माण गरिएका भवनसहितका संरचना हटाउन महानगरले डोजर प्रयोग गरेको हो । नालामाथि बनेको संरचना आफै हटाउन क्याम्पस प्रमुख भगवान यादव र सञ्चालक समितका अध्यक्ष सुनिल खेतानलाई गत शुक्रबार महानगरपालिकाबाट खटिएको टाेलीले निर्देशन दिएको थियाे । तर महानगरकाे निर्देशनलाई अटेर गरिएपछि मेयर सिंह दुई वटा डोजर लिएर आफै पुगेका थिए ।जिल्ला हुलाक कार्यालयदेखी मुख्य नाला सफाई गर्दै आएको महानगरपालिकाले नाला अतिक्रमण गरेर निर्माण गरिएका संरचना हटाउँदै नाला सफाईलाई निरन्तरता दिँदै आएको छ ।
हरिखेतान क्याम्पस पछाडीसम्मकाे मुख्य नाला यसअघि नै सफाई गरिसकेकाे छ । तर मुख्य नाला माथि नै निर्माण गरिएका क्याम्पसको संरचना नहट्दा मुख्य नाला सफाइमा अबरोध भएपछि क्याम्पसको संरचना तत्काल हटाउन महानगरपालिकाले गत शुक्रबार क्याम्पस प्रशासनलाई निर्देशन दिएको थियो ।यसअघि मुख्य नालामा पर्ने एक दर्जन संरचना हटाइ सकिएको छ ।
वीरगन्जमा मुख्य सडकको नाला र श्रीपुर क्षेत्रबाट आउने अर्काे नाला जोडिएर बनेको मुख्य नाला जिल्ला प्रशासन कार्यालय पर्साको छेउँ हुँदै दक्षिणतिर बगेको छ ।गीता मन्दीरदेखि आदर्शनगर हरिखेतान क्याम्पस सम्मको क्षेत्रमा मुख्य नालाको दुबै तर्फ अतिक्रमण गरेर संरचना बनेका छन् ।
आदर्शनगरको क्लासिक होटल र कर्पोरेट डेभलपमेन्ट बैंकको भवन पनि नाला माथि नै निर्माण गरिएको छ । अहिले क्लासिक होटल पछाडीसम्मको मुख्य नालामा बनेका संरचना हटाउँदै नाला पूर्ण रुपमा सफाई गरिसकिएको छ ।राष्ट्रिय वाणिज्य बैंक पछाडीतर्फ पनि हरिखेतान क्याम्पससम्मको क्षेत्रमा पर्ने मुख्य नालामा परेका संरचना हटाउँदै नाला सफाई गरिसकिएको छ ।महानगरले नाला अतिक्रमण गरेर निर्माण गरिएका संरचना हटाउन पटक पटक ताकेता गर्दा पनि अटेर गरिएपछि महानगरपालिका आफैले डोजर लगाएर हटाउँदै नाला सफाइलाई तिब्रता दिँदै आएको छ ।
वर्षौँदेखि मुख्य नाला सफाई नहुँदा वीरगन्ज शहर वर्षातको समयमा डुबानमा पर्दै आएको छ । यस पटक मुख्य नाला पूर्ण रुपमा सफाई गर्न महानगरले सबै उपाय अवलम्बन गरेको मेयर सिंहले बताए ।साेमबार डाेजर लिएर क्याम्पसमा पुगेका मेयर सिंहले सार्वजनिक नाला वा जग्गा अतिक्रमण गरि बनाइएका संरचना हटाएर खाली गराउने महानगरकाे अभियानमा साथ दिन वीरगन्जवासीसंग अनुराेध गरे ।उनले हरिखेतान क्याम्पस सामुदायिक क्याम्पस भएपनि वर्षाैदेखि नाला नै अतिक्रमण गरि संरचना बनाएकाे र त्यसले नालाकाे बहाव नै थुनिएकाले डाेजर लगाएर हटाइएकाे बताए ।सिंहले भने, क्याम्पस मात्रै हाेइन अन्य स्थानमा पनि नालामाथि बैंक र हाेटलकाे भवन बनाइएका छन् अब ती पनि डाेजर लगाएर हटाइन्छ , सार्वजनिक जग्गा र नालाकाे अतिक्रमण हटाउन महानगरले कसैसंग कुनै सम्झौता गर्दैन ।
