वीरगंज । पर्साकाे बहुदरमाई नगरपालिकाका किसानहरुलाई विषादी छर्कने स्प्रे ट्यांकी वितरण गरिएको छ । नेपाली कांग्रेस पर्साका सभापति समेत रहेका पर्सा क्षेत्र नम्बर ३ (ख) का प्रदेशसभा सदस्य जनार्दन सिंह क्षेत्रीकाे संसदीय क्षेत्र विकास काेषबाट बहुदरमाई नगरपालिकाकाे वडा नम्बर १ , ७, ८ र ९ का गरि १५४ जना किसानहरुलाई स्प्रे ट्यांकी वितरण गरिएकाे हाे । प्रदेशसभा सदस्य क्षेत्री आफैंले किसानहरुलाई स्प्रे ट्यांकी प्रदान गरेकाे विन्दवासिनी गाँउपालिकाका कांग्रेस सभापति विवेक चाैरसियाले जानकारी दिए ।

प्रदेश सभा क्षेत्रीले कृषि ,स्वास्थ्य शिक्षा र पर्यटन क्षेत्र आफ्नो प्राथमिकतामा रहेकोले सबै क्षेत्रलाई समेटेर संसदीय विकास काेषबाट योजनाहरु ल्याएको बताए । किसानको पीरमर्कालाई मध्यनजर गरि संसदमा आफुले पटक पटक आवाज उठाउने गरेको तथा किसानको समस्याका लागि सधै लडिरहने पनि उनले बताए ।

पर्सा क्षेत्र नम्बर ३ काे कांग्रेसका क्षेत्रीय सभापति श्रीकिसुन चाैहानकाे अध्यक्षता र प्रदेशसभा सदस्य क्षेत्रीकाे प्रमुख आतिथ्यतामा भएकाे कार्यक्रममा बहुदरमाई नगरपालिकाका पुर्वमेयर नितेन्द्र साह , विन्दवासिनी गाँउपालिकाका कांग्रेस सभापति विवेक चाैरसिया लगायतको पनि उपस्थिति रहेकाे थियाे ।