वीरगंज । पर्साको कालिकामाई गाउँपालिका वडा नम्बर ५ बिरञ्चीबर्वामा गत जेठ २३ गते आँप टिप्न आएका बालकलाई एयर गनले गोली प्रहार गरि घाइते बनाएर फरार भएका व्यक्ति पक्राउ परेका छन् । पक्राउ पर्नेमा बिरञ्चीबर्वाकै बलिराम तिवारी (दिपु) रहेका छन् । उनलाई इलाका प्रहरी कार्यालय पोखरिया र सशस्त्र प्रहरी पोखरियाको टोलीलाई पक्राउ गरेको हो ।
गत जेठ २१ गते घर नजिकैको रुखबाट आँप टिपेको निहुँमा तिवारीले एयर गनबाट गोली प्रहार गर्दा स्थानीय ९ वर्षिय बालक श्यामसुन्दर महत्तो घाइते भएका थिए । घटना लगत्तै फरार भएका तिवारीलाई शुक्रबार बिहान उनको घरबाटै पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायव उपरीक्षक दीपक गिरीले जानकारी दिए ।
तिवारीलाई शुक्रबार पक्राउ गर्ने क्रममा उनको घरमा खानतलाजी गर्दा एउटा पूरानो भरुवा बन्दुक समेत फेला परेको गिरीले जानकारी दिए । बरामद पूरानो भरुवा बन्दुक इजाजत प्राप्त हो की होईन भन्ने बारेमा अनुसन्धान भईरहेको उनले बताए । बालकलाई प्रहार गरेको एयर गर्न भने फेला पार्न नसकेको गिरीले बताए । यस बारेमापनि अनुसन्धान भईरहको इलाका प्रहरी कार्यालय पोखरियाका प्रहरी निरीक्षक मोहनविक्रम शाहीले जानकारी दिए । पक्राउ परेका तिवारीलाई इलाका प्रहरी कार्यालय पोखरियाको हिरासतमा राखेर थप अनुसन्धान भईरहेको शाहीले बताए ।
