वीरगंज । नेपाली नागरिकता माग्दै नागरिकताविहीन जन्मसिद्ध नागिरकका सन्तान र तीनका अभिभावकहरुले आज बिहीबारपनि काठमाडौंको माइतीघरमा विरोध प्रदर्शन गरेका छन् ।राष्ट्रपतिले प्रमाणीकरण गरेको नागरिकता विधेयक कार्यान्वयन नगरि यथास्थितिमा राख्न सर्वोच्च अदालतले गरेको अल्पकालीन आदेशविरुद्ध उनीहरूले बुधबारपनि माइतीघरमै प्रदर्शन गरेका थिए । प्रदर्शनमा सहभागी वीरगन्जका उत्तम कुमारले नागरिकता पाउने संवैधानिक अधिकारबाट आफूहरु बन्चित भएको बताए ।

विदेशी नागरिकहरुले सजिलै नागरिकता पाइरहेको तर आफ्नी छोरीले नागरिकता नपाएको उनले बताए । आफ्नो र आफ्नी श्रीमतीको जन्मसिद्धको नागरिकता भए पनि छोरीलाई नागरिकता नदिइएको उनको गुनासो छ । प्रचण्ड नेतृत्वको अहिलेको सरकारको सिफारिसमा नागरिकता विधेयक राष्ट्रपतिबाट प्रमाणीकरण भइसके पनि सर्वोच्च अदालतको अन्तरिम आदेशका कारण कार्यान्वयनमा आउन बाँकी छ । उत्तम कुमारले न्यायालय र कानुन व्यवसायीहरुप्रति पनि आक्रोश पोखे ।

‘विद्यादेवी भण्डारीले दुई–दुई पटकसम्म नागरिकता विधेयक प्रमाणीकरण नगर्दा कानुन व्यवसायीहरु कहाँ थिए ?’ उनले भने । जन्मसिद्ध नागरिकका सन्तानलाई बंशजको नागरिकता दिनुपर्ने , आमाको नामबाट पनि नागरिकता दिनुपर्ने, नेपाली नागरिकलाई अनागरिक बनाउन नहुने जस्ता नारा लेखिएको प्लेकार्ड उनीहरूले प्रदर्शन गरेका थिए । राष्ट्रपतिबाट प्रमाणीकरण भई राजपत्रमा प्रकाशन भईसकेको नागरिकता ऐन तत्काल कार्यान्वयन नगर्न सर्वाेच्च अदालतले अल्पकालीन आदेश दिएपछि नागरिकताविहिन देशभरका युवाहरूले प्रदर्शन गर्दै आएका छन् ।