वीरगञ्ज । भारतबाट अवैध तरिकाले नेपालमा विक्री वितरण गर्ने उद्देश्यले भित्र्याइएको गहुँ पर्सा प्रहरीले नियन्त्रणमा लिएको छ । प्रहरीले पोखरिया नगरपालिका वडा नम्बर ४ स्थित सतवरीयाबाट शुक्रबार बिहान ४ बजेको करिबमा अवैध तरिकाले भारतबाट नेपाल ल्याइएको साढे ८ क्विन्टल गहुँ नियन्त्रणमा लिएको हो ।

प्रहरीकाअनुसार विशेष सूचनाको आधारमा इलाका प्रहरी कार्यालय पोखरियाबाट खटेको प्रहरी टोलीले कालिकामाई गाउँपालिकाबाट पोखरिया हुँदै बाराको परवानीपुरसम्म गइरहेको ना ३ त २२९५ नम्बरको ट्रयाक्टरलाई सतवरियामा रोकेर चेकजाँच गर्दा ८१ क्विन्टल ४० किलोग्राम गहुँ बरामद भएको थियो । स्रोतकाअनुसार गहुँ सबैठवा नाका हुँदै नेपाल भित्रिएको हो ।

गहुँको लागि शितल गल्ला भण्डारको नाममा चलान काटिएको प्रहरी अनुसन्धानका क्रममा खुलेको छ । यद्यपि चलानीको आधारमा मात्रै ढुवानी गर्न अनुमति नहुँदा प्रहरीले गहुँ नियन्त्रणमा लिएको हो । गहुँ ढुवानीका लागि अनलाइन विल आवश्यक पर्छ । पछिल्लो समय भारतबाट अवैध तरिकाले गहुँको नेपालमा भित्र्याउने क्रम बढ्दै गएको छ । फितलो सुरक्षा व्यवस्थापनका कारण जिल्लाको ग्रामिण भेगमा पर्ने भारतीय बजारबात तस्करहरुले सहजै गहुँ लगायतका अन्य सामग्री नेपाल भित्र्याउने गरेका छन् । स्रोतका अनुसार तस्करहरुले सशस्त्र र नेपाल प्रहरीका अधिकृतहरुलाई आर्थिक प्रलोभनमा पारेर रातीको समय यसरी सामग्री भित्र्याउने गरेका छन् । अवैध तरिकाले सामग्रीहरु नेपाल भित्रिँदा राज्यले दैनिक लाखौँ रुपैयाँ राजश्व गुमाउनु पर्ने अवस्था छ ।