वीरगंज । बैशाख १० मा हुने उपनिर्वाचनका लागि बारा २ मा सत्तागठबन्धनबाट जसपाका उम्मेदवार उपेन्द्र यादवलाई जिताउन नेपाली कांग्रेसका तर्फबाट चुनावी कमाण्डरको जिम्मेदवारी पाएका सांसद अजयकुमार चौरसिया सकृय भएर लागेका छन्। कांग्रेसका सभापति एंव पूर्वप्रधानमन्त्री शेरबहादुर देउवाले बारा–२ मा गठबन्धनका साझा उम्मेदवार जसपा अध्यक्ष यादवलाई जिताउन पूर्वराज्यमन्त्री एंव कांग्रेस केन्द्रिय सदस्य समेत रहेका चौरसियालाई चुनावी कमाण्डर तोकेका हुन् ।

आफुले पाएको जिम्मेवारी सफल पार्न कांग्रेस केन्द्रिय सदस्य समेत रहेका चौरसिया गत आइतबार देखि नै बारा २ का विभिन्न गाँउमा पुगेर जसपा अध्यक्ष यादवको पक्षमा माहौल बनाउन लागिपरेका हुन् । बारामा कांग्रेसको जिल्ला , क्षेत्रीय र पालिका कार्यसमितिको नेतृत्वमा रहेका नेताहरुसंग छलफल र बैठक गरिररहेका चौरसियाले गठबन्धनका साझा उम्मेदवार यादवसंगै गाँउ गाँउमा चुनावी घरदैलो पनि गरिरहेका छन् । पालिका र वडा तहका कांगेस नेता र अगुवा कार्यकर्ताहरुको बैठक गर्दै चौरसियाले संसदमा उपेन्द्र यादवको आवश्यकता अपरिहार्य रहेकै कारण गठबन्धन नेतृत्वकर्ता दल कांग्रेसले बारा २ मा उनलाई समर्थन गरेको बताउदै आएका छन् ।

त्यसकारण बारा २ मा जसपा अध्यक्ष यादवलाई जिताउन सम्पूर्ण कांग्रेस नेता कार्यकर्तालाई एकजुट भएर लाग्न उनले निदेर्शन पनि दिएका छन् । मंगलबार गठबन्धनका साझा उम्मेदवार यादवसंगै चुनावी घरदैलो गरेका चौरसियासंगै मधेस प्रदेशका पुर्वमन्त्री ओमप्रकाश शर्मा, कांग्रेस बाराका सभापति राजेशराय यादव ,पर्साको बहुदरमाई नगरपालिकाका पुर्वमेयर नितेन्द्र साह ,बाराको महागढीमाई नगरपालिकाका मेयर उपेन्द्र प्रसाद यादव , जसपाका नेता रामबाबु यादव लगायतको पनि सहभागीता थियो ।