वीरगञ्ज । आइसिसि विश्वकप लिग २ मा नेपालको तर्फबाट उत्कृष्ट प्रदर्शन गरेका वीरगञ्जका दुई खेलाडीलाई वीरगञ्ज महानगरपालिकाले सम्मानित गरेको छ ।
विश्वकपमा क्वालिफायर भएपछि पहिलो पटक गृहनगर वीरगञ्जमा आइतबार आइ पुगेका नेपाली राष्ट्रिय क्रिकेट टिमका सदस्यद्वय आरिफ शेख (ओपनर ब्याट्सम्यान) र आसिफ शेख (अलराउण्डर) लाई वीरगञ्ज महानगरले भव्य स्वागत गर्दै सम्मान गरेको हो ।
आइतबार वीरगञ्ज महानगरपालिकाकै परिसरमा मेयर राजेशमान सिंहले सहोदर दाजुभाइ समेत रहेका शेखद्वयलाई दोसल्ला ओढाएर स्वागत र सम्मान गरेका हुन् । मेयर सिंहले शेखद्वयका बुबा शेख सलाम र स्थानीय प्रशिक्षक जाहुर अन्सारीलाई पनि दोसल्ला ओढाएर सम्मानित गरे ।
त्यसक्रममा मेयर सिंहले नेपाललाई विश्वकप क्वालिफायरमा पु-याउन विशेष भूमीका निर्वाह गरेका दुवै खेलाडीलाई वीरगञ्ज महानगरले यहि चैत १७ गते वीरगञ्जमा भव्य समारोह गरेर नागरिक अभिनन्दन गर्ने पनि घोषणा गरे ।
उक्त समारोहमै यसअघि वीरगञ्ज महानगरले घोषणा गरेअनुसार दुवै खेलाडीलाई एक/एक थान यमहा एफ जेड एफ आइ मोटरसाइकल पनि प्रदान गर्ने उनले बताए । मेयर सिंहले उक्त नागरिक अभिनन्दन समारोहमा सहभागी भइ वीरगञ्जका यी दुइ खेलाडीको हौसला बढाइदिन वीरगञ्जवासीसंग आह्वान पनि गरेका छन् ।
आइतबारको सम्मान कार्यक्रममा मेयर सिंहले वीरगञ्जका दुवै खेलाडीले नेपालको नाम अझ उचाईमा पुरयाएर वीरगञ्ज महानगरको नाम पनि उँचो बनाएको बताए । उनले भने, ‘वीरगञ्जका यी दुइ खेलाडी राष्ट्रकै गहना बनेका छन्, यिनीहरुको हौसला बढाउन वीरगञ्ज महानगरले कुनै कसर बाँकी राख्दैन ।’ महानगरले सम्मान गरेपछि खेलाडीद्वय आसिफ र आरिफले महानगरको यो सम्मानले आफुहरुलाई अझ हौंसला थपिएको प्रतिक्रिया दिए । आसिफले भने, ‘गृहनगरमै यति भव्य सम्मान पाउदा खुशीले मन गदगद् भएको छ, आउने दिनमा देशको नाम रोशन गर्न अझ हौंसला थपिएको छ ।’
सन्चारकर्मीलाई प्रतिक्रिया दिदै शेखद्वयका बुबा शेख सलामले आफ्ना यी दुवै छोराले देशको नाम अझ उचाईमा पुरयाउदाँ आफु पनि गौरवान्वित भएको प्रतिक्रिया दिए । उनले भने, ‘मेरा यी दुई छोरा अब मेरो मात्रै छोरा रहेनन्, अब यिनीहरु यो देशकै छोरा भएका छन् ।’
आइतबारको सम्मान कार्यक्रममा वीरगञ्ज महानगरका निमित्त प्रमुख प्रशासकिय अधिकृत अरविन्दलाल कर्ण, वडाध्यक्षहरु बैजुलाल स्वर्णकार, प्रदीप चौरसिया, सुरेश गुप्ता, जगत साह कानु लगायतको सहभागिता थियो ।
