वीरगंज । मधेश प्रदेशका प्रदेशसभा सदस्य (सांसद्) प्रमोद जयसवालका सवारी चालक पक्राउ परेका छन् । गत पुष ४ गते पर्सा राष्ट्रिय निकुञ्जमा वन्यजन्तु चोरी शिकारीको घटनामा संलग्न भएको आरोपमा प्रदेश सांसद् जयसवालका सवारी चालक सलिम मियाँ अन्सारी पक्राउ परेका हुन् । अन्सारीलाई पर्सा राष्ट्रिय निकुञ्जले नियन्त्रणमा लिएर अनुसन्धान अगाडि बढाएको छ ।

चोरी शिकारी घटनामा संलग्न रहेको आरोप लागेका प्रदेश सांसद् जयसवाललाई मङ्गलबार पर्सा राष्ट्रिय निकुञ्जका अधिकारीहरुले सोधपुछका लागि बोलाएका थिए । बयानका लागि जयसवालसँगै त्यहाँ पुगेका उनका चालक अन्सारीलाई नियन्त्रणमा लिइएको निकुञ्जका वार्डेन अशोक रामले बताए । ‘घटनामा चालक अन्सारीको सोझै संलग्नता देखिन्छ । मङ्गलबार सोधपुछका लागि प्रदेश सांसद् जयसवालसँगै अन्सारी पनि आएकोबेला हामीले उनलाई नियन्त्रणमा लिएर अनुसन्धान अगाडि बढाएका छौँ,’ निकुञ्जका वार्डेन रामले भने । अनुसन्धानका क्रममा चोरी शिकारीको घटनामा जयसवालसँगै उनका भाई तथा पर्साको सखुवाप्रसौनी गाउँपालिकाका पूर्व अध्यक्ष प्रदीप जयसवालको पनि संलग्नता देखिएको निकुञ्ज स्रोतले जनाएको छ । यद्यपी दुवैजनाले आफ्नो कुनै संलग्नता नरहेको बताउँदै आएका छन् । निकुञ्जले गरेको सोधपुछका क्रममा पनि उनीहरुले यही बयान दिएको वार्डेन रामले बताए ।

निकुञ्जका सुरक्षाकर्मीले पुष ५ गते सखुवाप्रसौनी गाउँपालिका वडा नम्बर १ अकवनियास्थित जयसवालद्वयकै घरमा छापामारी गरेर ३७ वर्षीय झापस दास थारु, ४४ वर्षीय विशाल सहनी, काभ्रे सांगा ६ का ५० वर्षीय दामोदर अधिकारी, धादिङ गंगाजमुना २ का ५२ वर्षीय म्लाङ दोङ तामाङलाई मृत हरिण, अवैध हातहतियार र केही नगदसहित पक्राउ गरेका थिए । छापामारीका क्रममा बा ५ च ७८०५ नम्बरको टोयोटा ल्यान्डक्रुजर जीप, प्रदेश २–०३–००१ च ३०९७ नम्बरको महिन्द्रा कम्पनीको बोलेरो जीपसमेत बरामद गरिएको थियो । सिकारका लागि प्रयोग गरिएको बरामद बोलेरो जीप प्रदेश सांसद् जयसवालकै हो । सखुवा प्रसौनीका स्थानीयका अनुसार मंसिर ४ को निर्वाचनको प्रचारप्रसारमा जयसवालले यही गाडी प्रयोग गरेका थिए ।