वीरगंज । मधेसी आयोगले सूचीकृत नै नभएको मधेस भाषामा शपथ किन खुवाएको भन्दै संघीय संसदको सचिवालयलाई स्पष्टीकरण सोधेको छ।आयोगले जनमत पार्टीका डा. सीके राउतसहित केही प्रतिनिधि सभा सदस्यलाई कुन आधारमा मधेसी भाषामा शपथ लिन मान्यता दिएको भन्दै स्पष्टीकरण सोधेको हो।पुस ७ गते औपचारिक कार्यक्रममा सीके राउतसहित केही प्रतिनिधि सभाका सदस्यले भाषा आयोग तथा मधेसी आयोगद्वारा सुचिकृत नरहेको ‘मधेसी भाषा’ मा शपथ लिएको भन्दै आयोगमा उजुरी परेपछि आयोगले स्पष्टीकरण सोधेको जनाएको छ।

उजुरीका पत्र आयोगमा आएपछि आयोगको गम्भीर ध्यानकर्षण भएको तथा सो भाषामा शपथ लिन संसद सचिवालयले कुन आधारमा मान्यता दिएको भन्दै आयोगकी उपसचिव सविता डंगोलले आयोगलाई स्पष्ट जानकारी गराउन संघीय संसदको सचिवालयलाई पत्र पठाएकी छन्|आयोगका अध्यक्ष डा.विजयकुमार दत्तले शपथ ग्रहण समारोहपछि दर्जनौ संघसंस्थाले फोन सम्पर्क गरी मधेसी भाषा औपचारिक रुपमा सुचिकृत नरहेको र सो भाषामा शपथ लिनुले अन्य विद्यमान भाषा माथि नकारात्मक प्रभाव पर्ने भएकाले यसमाथि आवश्यक कारवाही गर्न आग्रह गरेको बताए।