वीरगन्ज । पर्सा राष्ट्रिय निकुञ्ज, आधाभारले गएको सोमबार राति पक्राउ गरेको पाँचजना शिकारी सखुवाप्रसौनी गाउँपालिकाका पूर्व अध्यक्ष प्रदीप जयसवालको घरबाट पक्राउ परेको खुलेको छ । पूर्व अध्यक्ष जयसवालले सखुवाप्रसौनी गाउँपालिका वडा नम्बर १ अकुनियामा विश्रामको लागि घर निर्माण गरेको र सोही घरबाट निकुञ्जले पाँचजना शिकारीलाई मारिएका दुईवटा जरायो, हतियार, नगदसहित पक्राउ गरेको थियो । यस घटनामा निकुञ्जले बरामद गरेको प्रदेश २–०३–००१ च ३०९७ नम्बरको गाडी गत मंसिर ४ गतेको निर्वाचनबाट मधेश प्रदेशसभा सदस्यमा निर्वाचित प्रमोद जैसवालको रहेको बताएको छ । प्रदेशसभा सदस्य जैसवाल पर्सा क्षेत्र नं ३ को (१) बाट निर्वाचित भएका हुन् ।
उनी स्वतन्त्र उम्मेदवारी दिएर निर्वाचित भएको र पूर्वअध्यक्ष प्रदिप जैसवालका सहोदर दाजु हुन् । अहिले जैसवाल दाजुभाइ सम्पर्कविहीन छन् । उनीहरू सम्पर्कमा आउन चाहेका छैनन् । तर घटनामा समातिएको प्रदेशसभा सदस्यको नामको बोलेरो गाडी चोरी भएको भनेर प्रहरीमा उजूरी दिने प्रयास भएको प्रहरी स्रोतले बताएको छ । निकुञ्जले पक्राउ गरेपछि फिल्मी शैलीमा सो गाडी घटनाअगावै चोरी भएको देखाउन खोजिएको छ । तर प्रहरीले घटनामा गाडी बरामद भइसकेको अवस्थामा सो उजूरी लिन नमानेको प्रहरी स्रोतको भनाई छ । घटनामा पक्राउ परेका पाँचजना शिकारीमध्ये लक्ष्मण सहनी पर्सा जिल्लाका चर्चित गाँजा तस्कर हुन् । उनले आफ्नो नाम विशाल सहनी भनेर झुक्याउन खोजेका छन् ।
निकुञ्जले पनि घटना विवरण सार्वजनिक गरे पनि जैसवाल दाजुभाइलाई भने गोप्य राखेको छ । पक्राउ परेकाहरुले बयानका क्रममा पूर्वअध्यक्ष जयसवालको घरमा बसेको र बोलेरो गाडी प्रदेशसभा सदस्य प्रमोद जयसवालको भएको पुष्टि गरेको स्रोतले जनाएको छ । अहिले घटनामा बरामद बोलेरो गाडी चोरी भएको भनी प्रहरीमा उजूरी दिने प्रयासमा प्रदेशसभा सदस्य जयसवाल रहेको स्रोतले जनाएको छ । एकजना प्रहरीले जयसवालले चोरीको झूटो उजूरी दिन आएको तर सो उजूरी प्रहरीले लिन नमानेको बताए । निकुञ्जले घटना सार्वजनिक गरिसकेको अवस्थामा बरामद गाडी चोरी भएको भनेर प्रहरीले उजूरी लिन मानेको छैन ।
