वीरगंज । प्रतिनिधिसभाका नवनिर्वाचित सांसदहरुले पद तथा गोपनीयताको शपथ लिएका छन्। नयाँ बानेश्वरस्थित संसद भवनमा आयोजित समारोहमा ज्येष्ठ सदस्य पशुपति शमशेर जबराले शपथ खुवाएका हुन्। ज्येष्ठ सदस्य जबराले राष्ट्रपति विद्यादेवी भण्डारीबाट बुधबार शपथ लिएपछि आज अन्य सांसदहरुलाई शपथ खुवाएका हुन्।

शपथ समारोहमा अधिकांश सांसदहरुले राष्ट्रिय पोशाक लगाएका थिए भने कतिपयले आफ्नो संस्कृतिक झल्काउने पोशाकमा सजिएका थिए। १४ सांसदले मातृभाषामा शपथ लिएका हुन्। प्रतिनिधिसभाको निर्वाचन भएको ३३ दिनपछि सांसदले बिहीबार शपथ लिएका हुन्। प्रतिनिधिसभामा प्रत्यक्ष निर्वाचित एक सय ६५ र समानुपातिक प्रणालीबाट निर्वाचित एक सय १० गरी कूल दुई सय ७५ सांसद छन् ।

शपथपछि सांसदहरुलाई सांसदको लोगो वितरण गरिएको थियो। संसद बैठकबाट सभामुख चयन नभएको अवस्थामा सांसदमध्येका ज्येष्ठ सदस्यले शपथ खुवाउने प्रावधान छ। अब राष्ट्रपति भण्डारीबाट संसद अधिवेशन आह्वान भएपछि तोकिएको समयमा बैठक बस्नेछ।