वीरगंज । वीरगन्जका पत्रकार स्वर्गीय नरेश सर्राफको परिवारलाई वीरगन्ज महानगरपालिकाले तत्काल ५ लाख रुपैयाँ आर्थिक सहयोग उपलब्ध गराउने भएको छ । स्वर्गीय सर्राफको १० औँ दिनको पुण्य तिथिमा आइतबार वीरगन्जमा समाजवादी प्रेस संगठन र रेडियो वीरगन्जले आयोजना गरेको श्रद्धाञ्जली सभालाई सम्बोधन गर्दै महानगरका मेयर राजेशमान सिंहले स्वर्गीय सर्राफका परिवारको जिविकोपार्जनका लागि महानगरको तर्फबाट तत्कालका लागि ५ लाख रुपैयाँ आर्थिक सहयोग प्रदान गर्ने घोषणा गरेका हुन् । यसका साथै स्वर्गीय सर्राफको स्मृतिमा नेपाल पत्रकार महासंघ पर्सा शाखाको अगुवाइमा स्थापना गरिने स्मृति कोषमा महानगरपालिकाले १० लाख रुपैया उपलब्ध गराउने घोषणा पनि मेयर सिंहले गरे ।

मेयर सिंहले सर्राफकी छोरीको १० कक्षा सम्मको पठनपाठनको जिम्मा पनि महानगरपालिको लिने भन्दै उनको इच्छा बमोजिमको विद्यालयमा महानगरले पढ्ने व्यवस्था मिलाउने पनि बताए ।पत्रकार सर्राफको निधनले पर्सेली पत्रकारितामा कमी महशुस गराएको भन्दै मेयर सिंहले वीरगन्जका पत्रकारहरुको दुख पिडामा महानगर सदैव साथमा रहने प्रतिबद्धता पनि जनाए । आइतबारको श्रद्धान्जलीसभामै स्वर्गीय सर्राफको परिवारलाई रेडियो वीरगन्जले १ लाख रुपैया, समाजवादी प्रेस संगठन पर्साले १ लाख रुपैया र राष्ट्रिय भूमी आयोग पर्साका अध्यक्ष एवं जसपाका जिल्ला सचिव तबरेज अहमदले पनि ५० हजार रुपैयाँ नगद उपलब्ध गराएका छन् । कार्यक्रममा बोल्दै नेपाल पत्रकार महासंघ मधेस प्रदेशका महासचिव श्याम बन्जराले पत्रकारीताका माध्यमले सर्राफले समाजमा पुरयाएको योगदानको चर्चा गर्दै उनको परिवारको जिविकोपार्जनका लागि पत्रकार महासंघले छिटटै निर्णय लिने जानकारी गराए ।

आगामी पुष १ गते हुने पत्रकार महासंघ पर्सा शाखाको वार्षिक साधरणसभामा सर्राफको स्मृतिमा स्मृति कोष स्थापनाको औपचारिक निर्णय गरिने पनि बन्जाराले बताए । पत्रकार महासंघ पर्सा शाखाका सदस्य समेत रहेका ३८ वर्षिय सर्राफको यहि मंसिर १५ गते हृदयतघातबाट निधन भएको थियो । रेडियो वीरगन्जका अध्यक्ष ध्रुव साहको अध्यक्षतामा भएको श्रद्धाञ्जलीसभामा संविधानसभा सदस्य रामचन्द्र साह तेली , निवर्तमामन प्रदेशसभा सदस्य राजेश्वर साहका साथै राजनीतिक दलका प्रतिनिधि, व्यवसायी, सन्चारकर्मी लगायतको सहभागिता थियो । कार्यक्रमको सञ्चालन समाजवादी प्रेस संगठनका पर्सा जिल्ला अध्यक्ष मनोज पटेलले गरेका थिए ।