वीरगंज । प्रतिनिधिसभा सदस्य (सांसद्) रमेश रिजालले मुख्यमन्त्री पाउने जनमत पार्टीको अहिले हैसियत नभएको बताएका छन् । शुक्रबार बिहान एक रेडियो कार्यक्रममा अन्तर्वार्ता दिँदै नवनिर्वाचित सांसद् रिजालले भर्खरै गठन भएको जनमत पार्टीले मुख्यमन्त्री माग्ने हैसियत नभएको बताएका हुन् । ‘जनमत पार्टीले मुख्यमन्त्री मागेर हुँदैन । आफ्नो त्यो हैसियत पनि हुनुपर्यो । विस्तारै उहाँहरु पनि अगाडि बढेर मन्त्री पाउनुहोला, मुख्यमन्त्री नै कसरी दि हाल्ने,’ रिजालले भने । मधेश प्रदेशमा सरकार गठनका लागी कुनै दलसँग पूर्ण बहुमत नभएको खण्डमा गठबन्धनमा सहभागी हुन् जनमत पार्टीले आफूलाई मुख्यमन्त्री पाउनुपर्ने माग अघि सारेको छ । नेपाली कांग्रेसका नेता समेत रहेका रिजालले समानुपातिकतर्फको पुरुष सांसद् पूर्व पदाधिकारीलाई बनाउने कि पदाधिकारीलाई बनाउने भन्ने मापदण्ड नबनेको पनि प्रष्ट पारेका छन् । ‘कांग्रेसले समानुपातिकमा ३२ सिट पाएको छ । त्यसमा तीन जना मात्र पुरुषले पाउनुहुन्छ । महाभारत भए पनि रामायण भए पनि छान्नै पर्यो ।
गोपालमान श्रेष्ठ, विमलेन्द्र निधि, प्रकाशशरण महत सबै योग्य छ । जीवन परियार, फर्मुल्लाह मन्सुरको दाबी पनि उचित हो । अहिले मेरो, तपाईँको अनुमान मात्र हो । पार्टीको बैठक नबसीकन कसरी भन्न सकिन्छ ? हामीले चाहेर मात्र हुँदैन । बहुमतले जे तय गर्छ, त्यही हुन्छ,’ रिजालले भने । रिजालले गठबन्धनको बहुमत पुग्ने र शेरबहादुर देउवा फेरि प्रधानमन्त्री बन्ने ठोकुवा पनि गरे । उनले थपे, ‘गठबन्धनको बहुमत पुग्छ । जसपा, जनमत र केही स्वतन्त्रहरु गठबन्धनमा आउँछन् । प्रधानमन्त्रीमा तत्काल शेरबहादुर देउवाको विकल्प छैन । मलाई आलोपालोको ज्ञान भएन । जनतालाई स्थिर सरकार दिन्छु भन्ने अनि ६-६ महिनामा प्रधानमन्त्री आलोपालो गरिरहने ? पाँच वर्षको प्रधानमन्त्री देउवा नै हो ।’ प्रधानमन्त्रीका निम्ति गठबन्धन तोडिने कल्पना नगरेको पनि रिजालले बताए । प्रधानमन्त्री बन्नका निम्ति रामचन्द्र पौडेलसँग प्रयाप्त शक्ति नभएको र गगन थापा थापाको अहिले प्रधानमन्त्री बन्ने समय नआएको बताउँदै रिजालले भने,
‘गगनको समय आइसकेको छैन ,पछि पछिका लागि भूमिका बनाउनुभएको हो ,संसदीय दलमा उहाँले देउवालाई हराउन सक्नुहुन्न , रामचन्द्र पौडेलले बन्छु भनेर मात्र हुँदैन, आफ्नो शक्ति पनि हुनुपर्छ ,अब देउवालाई रामचन्द्र, प्रकाशमानले पनि सहयोग गर्नुपर्छ , पछि पालो आउँछ ।’नेकपा माओवादी केन्द्रका अध्यक्ष पुष्पकमाल दाहाल पनि प्रधानमन्त्री नबन्ने उनको भनाई छ । मधेस प्रदेशमा कांग्रेस हुनुपर्ने जति बलियो नदेखिएको पनि रिजालले स्वीकारे । उनले भने, ‘कांग्रेसको कन्जबिजोग भएको छैन । एमाले हामीभन्दा ठूलो पार्टी भएको सत्य हो । मधेश प्रदेशमा गठबन्धनकै सरकार बन्ने सम्भावना छ । मुख्यमन्त्री को बन्ने तय भएको छैन ।
