वीरगंज । जिल्लाको शुक्लागण्डकी नगरपालिका–४ दुलेगौंडामा शुक्रबार दिउँसो रड प्रहारबाट एक जनाको मृत्यु भएको छ । मृत्यु हुनेमा देवघाट गाउँपालिका–२ क्वादी घर भई हाल दुलेगौंडा बस्दै आएका २४ वर्षीया विरम आले रहेको जिल्ला प्रहरीले जनाएको छ ।

आले दुलेगौंडास्थित रिमाल अटो केयरमा कार्यरत थिए । सोही अटो केयरमा काम गरिरहेको अवस्थामा सर्लाही गौरीशंकर नगरपालिका–५ वगरवा घर भई हाल दुलेगौंडा बस्दै आएका २५ वर्षीय नवीनकुमार चौधरीले पछाडिबाट रडले आलेको टाउको समेतको भागमा हिर्काइ घाइते बनाएको प्रहरी नायब उपरीक्षक युवराज खड्काले बताए ।

घाइते आलेलाई तनहुँ सेवा अस्पताल दुलेगौंडामा सामान्य उपचारपश्चात थप उपचारका लागि मणिपाल शिक्षण अस्पताल पोखरा पठाइएकोमा उनको उपचारको क्रममा मृत्यु भएको खड्काले बताए । उक्त घटनामा संलग्न रहेका चौधरीलाई नियन्त्रणमा लिई थप अनुसन्धान भइरहेको जिल्ला प्रहरी कार्यलयले जनाएको छ ।