वीरगंज । पर्सा क्षेत्र नम्बर ३ मा जसपा–एमाले गठबन्धनका उम्मेदवारहरुलाई जिताउन दुवै दलका नेता कार्यकर्ताहरु कम्मर कसेर लागेका छन् । प्रतिनिधिसभा सदस्यका उम्मेदवार राजकुमार गुप्तासँगै प्रदेशसभा सदस्यमा पर्सा ३ (ख ) की उम्मेदवार डाक्टर मधु गुप्ता कुर्मी र ३ (क) का एमाले उम्मेदवार मञ्जुर आलमलाई जिताउन जसपा–एमालेका नेताकार्यकर्ताहरु लागि परेका हुन् ।

प्रदेशसभा सदस्य उम्मेदवार डाक्टर मधुले पर्सा क्षेत्र नंबर ३ मा जसपा एमालेका साझा उम्मेदवारको जीत नै जिल्लाको विकासको आधार भएको बताइन् ।जसपा नेता हरिनारायण रौनियारले पर्सा ३ को विकासका लागि यो क्षेत्रबाट जसपा–एमाले तालमेलका नेताहरुको जितको खाँचो रहेको औंल्याए ।

जसपा केन्द्रीय सदस्य सल्मा खातुनले चुनावी तालमेल चुनावसम्म मात्रै नहुने भन्दै विकास र समृद्धिको लागि जसपा र एमालेबीच सहकार्य हुने स्पष्ट पारिन् ।नेकपा एमालेका नेता शिव पटेलले विपक्षी दलका उम्मेदवारको हार निश्चित भएको भन्दै मतदातालाई एमाले र जसपा गठबन्धमा भोट हाल्न आग्रह गरे ।