वीरगंज । सन् २०२२ को टी–२० विश्वकपमा आयोजक अष्ट्रेलियाको समस्या लगातार बढिरहेको छ। टोलीका विकेटकिपर ब्याट्सम्यान म्याथ्यु वेड कोरोनाको चपेटामा परेका छन्। तर, म्याथ्यु वेडमा कोरोनाको हल्का लक्षण मात्रै देखिएको बताइएको छ। बिहीबार कोरोना पोजेटिभ भेटिएपछि म्याथ्यु वेडले अस्ट्रेलियाको वैकल्पिक प्रशिक्षण सत्रमा भाग लिएका छैनन्। तर प्रतियोगिताको नियमअनुसार उनी इंग्ल्याण्डविरुद्धको खेलका लागि उपलब्ध हुन सक्नेछन्। म्याथ्यु वेडअघि स्पिनर एडम जाम्पा पनि कोरोनाको सिकार भएका थिए।

त्यसैले श्रीलंकाविरुद्धको अन्तिम खेलमा उनको स्थानमा बायाँ हाते स्पिनर एस्टन अगरलाई टिममा राखिएको थियो। प्रतियोगिताको नियमअनुसार म्याथ्यु वेड छनोटका लागि उपलब्ध हुन सक्छन् तर उनको स्वास्थ्य राम्रो नभए अष्ट्रेलियाका लागि ठूलो समस्या हुनसक्छ। किनभने टोलीका १५ खेलाडीमा कुनै अतिरिक्त विकेटकिपर ब्याट्सम्यान छैनन्। टूर्नामेंटको सुरुमा, जोस इंग्लिस चोटका कारण बाहिर भएका थिए। अष्ट्रेलियाले अब एलेक्स केरी, जोस फिलिप, बेन म्याकडरमोट वा जिमी पियर्सन जस्ता ब्याकअप किपरलाई टोलीमा थप्न सक्दैन।

यसका लागि उनीहरूले प्रतियोगिताको बाँकी समयका लागि वेडलाई छोड्नुपर्नेछ र उनको स्थानमा अर्को विकेटकिपरलाई नियुक्त गर्नुपर्नेछ, जुन असम्भव देखिन्छ। अष्ट्रेलिया अहिले अंक तालिकाको पाँचौं स्थानमा छ। यस्तो अवस्थामा इंग्ल्यान्डसँगको खेल निकै महत्वपूर्ण बन्न पुगेको छ। पहिलो खेलमा न्युजिल्यान्डसँग ८९ रनको ठूलो हार बेहोरेको थियो भने श्रीलंकासँग पनि टोली संघर्षरत देखिएको थियो। तर अन्त्यमा मार्कस स्टोइनिसको पारिले टोलीलाई जित दिलाएकाे थियाे।